Бизнисот со здружени сила за поефикасна македонска економија!

Бизнис секторот се здружи и има план заеднички да делува се со цел остварување на подобри резултати во иднина. Трите најголеми бизнис организации на државата: Стопанската комора, Сојузот на стопански комори и Комората на Северозападна Македонија остварија заедничка средба на која првите луѓе на овие здруженија претседателот на СКСМ Азески, претседателот на ССКСМ Ѓорѓиевски и в.д. претседателот на СКСЗМ Алиу постигнаа заеднички консензус околу бизнисот. Заложбите се дека економијата мора да оди напред и соработката со владата мора да се подобри.

Со таквото заедничко дејствување се очекува да биде подобрена позицијата на бизнисот пред отварањето на крупните прашања врзани за владеење на правото, пазарната ориентација, инфраструктурата, инвестициите и извозот. Исто така претседателите на трите најзначајни бизнис-организации во државата, јавно ќе повикаат на единство на сите чинители на економските политики, да ја поддржат Владата во насока на отворање на нов инвестиционен циклус и затварање на отворените прашања кои го кочат бизнисот.

Бирократските процедури, парафискалните давачки, поддршката на малите и средни бизниси, даночната политика се само дел од предизвиците со кои се соочува стопанството низ годините. Во моментов можеби како прв проблем е недостатокот на работен кадар, но со силна волја и инвестирање во вработените, ако не да се елеиминира овој проблем може секако да се ублажи.

Од владата остануваат на ставот дека се и ќе бидат партнер на бизнисот. Целта пак на властите е да ја подобрат бизнис климата, но и да привлечат нови инвестиции од странство и да ги вратат работниците кои заминале во европските земји каде бараат подобар живот.

Како потврда за ова од Илинденска број 2 велат дека се поделени средства од Унгарскиот кредит, кои досега изнесуваат 200 милиони евра за бизнис инвестиции. Токму вчера беше одобрена нова транша во висина од речиси 13 милиони евра за проекти кои пред се имаат за цел да ја подобрат продуктивноста на економијата.

И.П