„Porsche“ отворено го пофали „Hyundai Ioniq 5 N“, тврдејќи дека овој електричен „жежок хечбек“ поставил нови стандарди меѓу спортските електрични модели.
Франк Мозер, потпретседател задолжен за моделите „Porsche 718“ и „911“, за австралискиот „Drive“ изјави дека возењето на „Ioniq 5 N“ е откровение и дека Корејците направиле автомобил кој е навистина, навистина добар.
Особено му се допаднал вештачкиот звук на моторот и симулациите на менување брзини, карактеристики што „Porsche“ сега ќе ги воведе во електричните верзии на моделите „Boxster“ и „Cayman“.
Возачите ќе можат да ги вклучуваат или исклучуваат, а кога ќе се активираат, автомобилот ќе обезбеди искуство слично на 6-цилиндричен „боксер“ мотор, вели германската компанија.
Мозер, исто така, откри дека Андреас Преунингер, човекот задолжен за моделите „Porsche GT“, првично одбил да го тестира електричниот „Hyundai“, но режимот „N Green Boost“ целосно го импресионирал.
Оваа функција на „Ioniq 5 N“, активирана со црвено копче на воланот, накратко ја зголемува моќноста на 650 „коњи“, овозможувајќи забрзување до 100 км/ч за 3,4 секунди.
Електричните модели на „Porsche 718“ ќе пристигнат најрано во 2027-ма година. Првично беше планирано да бидат чисто електрични, но најмоќните верзии сепак ќе ги задржат бензинските мотори, веројатно во комбинација со „T-Hybrid“ технологијата.
Иако EV верзиите ќе бидат потешки од сегашната генерација, „Porsche“ ветува дека новиот 718 сепак ќе биде меѓу најлесните електрични спортски автомобили.
