Шпанија ја комплетираше програмата за собирање средства од пазарот за обврзници за да ги финансира потребите на државата во 2013 година, наведува Министерството за економија во Мадрид.
Со продажбата на среднорочни и долгорочни обврзници од почетокот на годината се обезбедени 121 милијарда евра, наведува министерството, пренесува агенцијата Франс прес.
Откако во средината на 2012 година речиси беше принудена да побара меѓународна финансиска помош, на Шпанија и пристигна помош во вид на ветување од Европската централна банка дека ќе инвестира на пазарите за обврзници како вид на поддршка за проблематичните земји од еврозоната.
Мадрид на најновата аукција за тримесечни и деветмесечни обврзници собра 4,5 милијарди евра, со каматни стапки кои пораснаа на 0,405 од 0,294 проценти од претходната аукција, додека приносите на деветмесечните записи се намалија на 0,662 од 0,682 проценти во октомври.