Ирска ја предводи листата на земји од Европската унија со најголем раст на вредноста на земјоделското производство во 2024-та година, со зголемување од 8,9% во однос на претходната година, покажуваат најновите податоци на Евростат. Веднаш зад неа се наоѓа Хрватска со раст од 8,8%, а трета е Шведска со 5%.
На спротивниот крај на листата се наоѓа Франција, која бележи најголем пад на вредноста – намалување од 9%, по неа следи Романија со 8,5%, додека Бугарија е на третото место со пад од 8%.
Во 15 земји-членки на ЕУ, вредноста на земјоделското производство во 2024-та година била поголема во споредба со претходната, што укажува на умерено закрепнување по нестабилниот период во 2023-та година.
Според податоците на Евростат, вкупната вредност на земјоделското производство во Европската унија во 2024-та година достигнала 531,9 милијарди евра, што претставува намалување од 0,9% во споредба со 2023-та година кога изнесуваше 536,7 милијарди евра.
Ова е втора година по ред во која се забележува благ пад на вкупната вредност, по врвот достигнат во 2022-ра година. Намалувањето главно се должи на падот на номиналните цени на земјоделските производи за 1,8%, и покрај тоа што обемот на производство пораснал за 1%.
Половина од вредноста на земјоделското производство во ЕУ (50,3%) потекнува од земјоделски култури – 267,7 милијарди евра, што е намалување од 3,1% во однос на 2023 година. Од друга страна, животинското производство учествува со 41,1% или 218,8 милијарди евра и бележи раст од 1,9%. Преостанатите 8,5% доаѓаат од земјоделски услуги и секундарни активности, вредни 45,4 милијарди евра, со мал пад од 0,6%.
Истовремено, расходите за земјоделско производство во Европската унија се намалиле за 3,7%, достигнувајќи 303,3 милијарди евра, што резултирало со зголемување на бруто додадената вредност во земјоделството за 3,1%, односно на 228,6 милијарди евра.
