Европската унија (ЕУ) мора да го преиспита својот социјален модел, поради растот на јавниот долг кој се заканува да стане „експлозивен“ доколку не се спроведат реформи во бизнисот и трудовиот сектор, објави Меѓународниот монетарен фонд (ММФ).
Во најновиот извештај, ММФ проценува дека просечниот долг во ЕУ би можел да се удвои и да достигне околу 130 проценти од бруто домашниот производ (БДП) до 2040 година, доколку нема значителни корекции во трошењето и наплатата на јавните приходи.
ММФ предупредува дека некои членки – како што се Италија, Франција и Шпанија, веќе имаат долг над 100 проценти од БДП, поради што се под надзор на Европската комисија (ЕК) преку постапката за прекумерен дефицит.
Како што е наведено, традиционалните мерки за консолидација, како што се привремени намалувања или зголемување на даноците, повеќе не се доволни во земјите со хронично високи дефицити.
Фондот проценува дека поголем фискален притисок произлегува од две паралелни обврски на европските земји. Потребата од инвестиции во одбраната и енергетската транзиција се зголемува, додека во исто време растат трошоците поврзани со стареењето на населението, како што се расходите за здравство и пензии, пишува „Еурактив“ со седиште во Брисел.
Фондот им предлага на европските земји да го „опуштат“ јавниот сектор преку поттикнување на растот и ефикасноста, зајакнување на единствениот пазар на капитал и енергија, поедноставување на регулаторните процедури за економијата и поголема употреба на заедничко европско задолжување за клучни инфраструктурни проекти.
ММФ проценува дека овие реформи донекаде би ја ублажиле потребата од остри намалувања на буџетот, но дека веројатно нема да бидат доволни.
Затоа, Фондот додава дека ќе биде неопходен „поширок преглед на социјалниот договор“ во Европа, што во пракса би можело да значи одвојување на основните и „премиум“ услугите во областите на пензиите, здравството и образованието, при што само основното ниво би било целосно финансирано од државата.
Ваквите реформи носат политички и социјални ризици, а Фондот препорачува европските политичари постепено да ги воведуваат и јавно да им ги објаснуваат на граѓаните со цел да се зачува довербата во општеството и легитимноста на промените.
 до 2040 година){kind=link}