По 15 години на интернет, некогаш најкористениот дигитален аудио плеер „Winamp“, наскоро ќе стане само спомен, пишува „PC Magazine“.
Според краткото известување на страницата на „Winamp“, по 20 –ти декември 2013-та година плеерот веќе нема да е достапен за преземање. Ова го вклучува и „Winamp.com“ и сродните услуги.
На крајот на 90-тите и почетокот на 2000-та година „Winamp“ беше најзастапена услуга за слушање музика и радио. Таа ја изгуби својата популарност, откако услуги како „iTune“ и „Windows Media Player“ се појавија на интернет. „Winamp“ беше развиен од поранешните студенти на Универзитетот во Јута, Џастин Френкел и Дмитро Болдирев и стартуваше во 1997-та година.
Овој плеер брзо стекна популарност меѓу корисниците. Компанијата „AOL“ ја купи компанијата на Френкел за 80 милиони долари во 1999-та година. Во 2007-та година, кога „Winamp“ ја одбележа 10-тата годишнина повеќето луѓе веќе беа фокусирани кон модерните дигитални услуги за музика.
