Годишната стапка на потрошувачка инфлација во Турција падна на 33,52% во јули, според податоците на Турскиот статистички институт објавени во понеделник, продолжувајќи го трендот на опаѓање и покрај значителното зголемување на цените во секторите за домување и образование.
На месечно ниво, инфлацијата изнесуваше 2,06%, што е под очекувањата на аналитичарите, кои прогнозираа зголемување од 2,4% во јули. Во јуни, месечната инфлација беше 1,37%, додека годишната инфлација беше 35,05%.
На 24 јули, Централната банка на Турција ја намали референтната каматна стапка за 300 базични поени, со што повторно го започна циклусот на монетарно олабавување. Во таа прилика, Банката предупреди дека поради специфични фактори во јули, може да има привремено зголемување на месечната инфлација.
Зголемувањето на цените на горивото, тутунот и природниот гас придонесе за ценовниот притисок. Во јули, цените на транспортот се зголемија за 2,89% во споредба со претходниот месец, додека алкохолните пијалоци и тутунот се зголемија за 5,69%. Домувањето забележа месечно зголемување на цените од 5,78%.
Цените на производителите, според индексот на домашните производители, се зголемија за 1,73% на месечна основа, додека годишниот раст изнесуваше 24,19%.
Според анкетата на Ројтерс, инфлацијата би можела да падне на 29,75% до крајот на годината, што е сепак повисоко од проценката на централната банка за инфлација од 24%.
Министерот за финансии Мехмет Шимшек изјави дека трендот на дезинфлација е во согласност со планираните цели и дека инфлацијата на крајот од годината ќе биде во рамките на проекциите на централната банка.
„Ќе продолжиме решително да ја спроведуваме нашата економска програма со цел да постигнеме трајна стабилност на цените, што е наш врвен приоритет“, рече Шимшек во објава на платформата X.
