Здружението на германската автомобилска индустрија (VDA) и производителот на автомобили со седиште во Минхен во својот контроверзен план од десет точки нагласија дека ги поддржуваат целите на Парискиот климатски договор. Сепак, сега веруваат дека е неопходна промена на курсот.
„BMW“ и другите производители на автомобили веќе некое време соработуваат со „VDA“ и европското здружение на производители „ACEA“ за да ги заменат сегашните ограничувања за емисии на CO2 за возниот парк во иднина со анализа на животниот циклус (LCA).
Оваа анализа е метод што го проценува влијанието на возилото врз животната средина во текот на целиот негов животен циклус.
Таа не ги зема предвид само директните емисии при возење, туку и индиректните емисии што се јавуваат за време на производството, употребата и отстранувањето на возилото, како и емисиите поврзани со производството на потребната енергија и материјали.
Еден од најистакнатите застапници на оваа методологија за патнички автомобили е германскиот европратеник Јенс Гизеке (CDU), кој наведува:
„Моментално сме сведоци дека едностраниот фокус на електромобилноста не е доволен за ефикасна борба против климатските промени. За да успееме, ни се потребни сите технологии што ни се достапни.“
Глобалните компании ќе продолжат да произведуваат и продаваат возила со мотори со внатрешно согорување.
„Ако не го постигнеме овој договор, ризикуваме понатамошно затворање на фабриките и губење на просперитетот. Анализата на животниот циклус е клучна за фер проценка на емисиите од различни погонски системи. Според законот за емисии на CO2 за патнички автомобили, ѝ дадовме рок на Комисијата до 31-ви декември оваа година да развие методологија за пресметување на емисиите во текот на животниот циклус на автомобилот“, предупредува Гизеке.
