Европската централна банка (ЕЦБ) планира да ја провери отпорноста на банките во еврозоната на геополитички превирања следната година, изјави главниот супервизор Клаудија Бух, во контекст на сè поизразен фокус на ризиците, вклучувајќи ги царините и санкциите.
ЕЦБ долго време предупредува дека геополитиката е меѓу најголемите ризици за банките во еврозоната поради конфликтите во Украина и окупираниот палестински појас Газа и трговската војна што ја започна американскиот претседател Доналд Трамп.
Централната банка на еврозоната затоа одлучи да ја испита отпорноста на банките на овој вид ризик, менувајќи го сегашниот модел на тестирање.
ЕЦБ обично им презентира на банките неколку можни сценарија, а тие мора да пресметаат колку капитал би изгубиле ако тие се остварат.
Во новиот преглед, ЕЦБ ќе им обезбеди примери за нивоата на исцрпување на капиталот и ќе ги замоли да смислат свои сценарија за активирање.
„На тематскиот стрес-тест во 2026 година, ќе го следиме тестот од оваа година и ќе побараме од банките да проценат кое сценарио за геополитички ризик би можело сериозно да влијае на нивната солвентност“, им рече Бух на европратениците.
Заедно со контролата, супервизорите со месеци ги предупредуваат банките да се подготват за политички мотивирани нарушувања, вклучително и глобален недостиг на долари доколку централната банка на САД ги повлече своите алатки за решавање на кризи.
Како дел од редовниот надзор на ЕЦБ, на банките им е кажано да бидат внимателни на изложеноста кон други земји, како преку странски операции, така и преку кредити за извозници, изјавија извори од централната банка за Ројтерс.
Сајбер нападите исто така се сметаат за ризик, особено во балтичките земји, кои беа цел на руски хакери, велат изворите.
Супервизорите не им кажуваат на банките да ја намалат својата изложеност и не им даваат конкретни препораки во тековната фаза, туку ги охрабруваат да ги заострат контролните механизми и да размислат за планови за непредвидени ситуации.
Портпаролот на ЕЦБ одби да ги коментира наводите на изворот.
Следната година, проверката на ЕЦБ ќе биде дел од сопствената проценка на банките за нивните капитални потреби, позната во жаргонот на регулаторот како процес на проценка на адекватноста на внатрешниот капитал.
ЕЦБ спроведува тематски прегледи на здравјето на банките во еврозоната секоја втора година, а во „паузата“ Европскиот банкарски орган (ЕБА) ја проверува нивната отпорност на шокови на ниво на Европската унија. Во 2024 година, ЕЦБ ја анализираше отпорноста на кредиторите на сајбер ризици.
Резултатите од најновиот тест спроведен од ЕБА, кој вклучуваше некои американски тарифи во неповолното сценарио, ќе бидат објавени на почетокот на август.
Заканите на Трамп за воведување санкции врз купувачите на руска нафта, исто така, се сметаат за ризик. Главни купувачи се Кина, Индија и Турција.
