Доколку се прашувате дали потенцијалниот работодавач има здрава и пожелна работна култура, размислете да поставите три специфични прашања за време на интервју за работа, советува експертот за корпоративна култура Марион Кампан.
„Да, интервјуто е важно затоа што им помага да ве изберат вас како иден вработен, но исто така ви помага да ги изберете нив како ваш иден работодавач“, рече Кампан, основач на фирмата за човечки ресурси и консалтинг „Интандид“, во говорот на TED во април. Првото прашање, вели тој, може да изгледа едноставно, но може да открие колку потенцијал имате за напредување во таа фирма:
„Како се унапредуваат луѓето тука?“
Обрнете внимание на тоа дали компанијата редовно ги унапредува своите вработени и според кои критериуми. Позитивниот одговор треба да нагласи дека унапредувањето им се дава на оние кои се најдобри во својата работа и кои навистина ја претставуваат културата на компанијата.
„Кои се основните вредности на вашата компанија?“
Според него, силниот одговор јасно ќе ги артикулира тие вредности и ќе даде конкретни примери од неодамнешната пракса, каде што вработените ги демонстрирале тие вредности во акција. Кампан забележува дека идеалната работна култура не постои, но важно е да се знае како компанијата реагира во предизвикувачки ситуации.
„Кога последен пат добивте повратен фидбек?“
Ако соговорникот одговори дека добива повратни информации само еднаш годишно, на годишната евалуација, ова не е добар знак, предупредува Кампан. Наместо тоа, барајте одговори што укажуваат на редовни и континуирани повратни информации, идеално дури и секојдневно.
Поставувањето паметни и значајни прашања за време на интервјуто е одличен начин да се истакнете како кандидат, но и да дознаете повеќе за вашата потенцијална работа.
Слично на предлозите на Кампан, прашања како „Што имаат заедничко вашите најуспешни вработени?“ или „Што најмногу ви се допаѓа во културата на оваа компанија?“ можат да откријат какви вредности навистина негува компанијата и како е да се работи таму, вели Нолан Черч, поранешен регрутер на Google и сегашен директор на фирмата за анализа на плати FairComp.
„Кога ќе поставите конкретно прашање за некој аспект од работната култура што некому навистина му се допаѓа, ќе добиете конкретен одговор“, изјави Черч за CNBC Make It. „Тие конкретни информации водат до вистински гледишта.“
