Две клучни функции кои не беа вклучени во официјалната презентација на „WWDC“, „Apple“ планира да ги објави подоцна оваа година.
„Apple“ сè уште задржува две важни функции во „iOS 26“, кои не беа прикажани за време на воведната презентација на овогодишната конференција „WWDC“, иако се очекува да бидат достапни за корисниците до крајот на годината.
Според информациите објавени од „Bloomberg“, „Apple“ одлучил сè уште да не ги открива сите нови функции за да избегне објавување функции кои сè уште не се технички подготвени за употреба.
Превод во реално време преку „AirPods“
Првата функција им овозможува на корисниците на „AirPods“ да слушаат превод во живо на говорот на соговорникот на друг јазик. Технологијата го користи системот „Live Translation“ кој е дел од пакетот „Apple Intelligence“ во „iOS 26“, но сега преводот се испраќа директно на слушалките – без да мора да се гледа екранот. Функцијата е насочена конкретно кон корисници кои патуваат или работат во меѓународна средина.
Автоматско споделување на „Wi-Fi“ помеѓу уредите на „Apple“
Друга новина се однесува на јавните „Wi-Fi“ мрежи, особено оние што бараат рачно најавување преку таканаречениот „captive port“ (како што се хотели, кафулиња и аеродроми). Новиот систем ги памти податоците на еден уред, а потоа автоматски ги синхронизира со другите уреди на корисникот преку „iCloud“, со што се избегнува повторно внесување на податоци на секој уред.
Иако овие функции беа подготвени за демонстрација, „Apple“ одлучи да ги задржи за подоцнежни ажурирања. Според аналитичарот Марк Гурман, функциите би можеле да станат достапни во текот на есента – најверојатно во „iOS 26.1“ (октомври) или „26.2“ (декември), во зависност од темпото на развој и тестирање.
За потсетување „Apple“ веќе објави голем број нови функции на „WWDC 2025“: нов дизајн на интерфејсот „Liquid Glass“, подобрени заклучени екрани, подлабока интеграција на вештачката интелигенција во пораките, фотографиите и повиците, како и подобрувања во приватноста и безбедноста.
„iOS 26“ моментално е достапен во бета верзија за програмери, а јавната бета верзија се очекува во јули. Се очекува финалната верзија да биде лансирана заедно со новите модели на „iPhone“ во септември.
