„Honda“ лансираше нова компанија за микромобилност наречена „Fastport“ и објави планови да го претстави својот прв производ на саемот „Eurobike“ подоцна овој месец.
Станува збор за „eQuad“, електричен квадрицикл за испорака, дизајниран за употреба во урбани средини.
Ова необично возило е далеку од спортскиот „Honda Acura NSX“, но има за цел да го намали градскиот метеж и да ја задоволи растечката побарувачка на потрошувачите за побрзи и почести испораки.
Како дел од тој напор, „eQuad“ е дизајниран да се вози по велосипедски патеки и ќе се нуди во различни конфигурации за да одговара на потребите на различните корисници.
„Honda“ споменува мали и големи модели „eQuad“, како и мали и големи товарни прегради, што ќе му овозможи на возилото да покрие широк спектар на намени, вклучително и испорака на пакети, намирници и мали пратки.
Помалиот модел е долг 3.400 mm, широк 1.000 mm и висок 2.100 mm, додека поголемиот „eQuad“ има димензии од 3.658/1.219/2.134 mm.
Надградбите на товарниот простор нудат капацитет од 2.720 до 4.190 литри, додека носивоста е 145 кг за помалиот и 295 кг за поголемиот модел.
Во однос на дизајнот, „eQuad“ е буквално кутија на тркала. Во „кабината“ се сместени седиште за велосипед и кормило, како и голем екран кој служи како дигитална контролна табла и инфозабавен систем.
Возилото е опремено со светла, ретровизори, настрешница со UV заштита и вентилатор за удобност на возачот.
„Honda“ не ги објави сите технички спецификации, но потврди дека максималната брзина на „eQuad“ ќе биде 20 км/ч. Помалиот модел ќе има домет до 37 километри, иако тоа зависи од товарот.
Компанијата вели дека „eQuad“ користи заменливи батерии за складирање на електрична енергија. Исто така, постојат регенеративни системи за сопирање и автоматска рачна сопирачка.
Како што е наведено, „eQuad“ ќе се произведува во производствениот центар „Honda Performance“ во Охајо, каде што до неодамна се произведуваше гореспоменатиот „NSX“.
Првите испораки во Европа и Северна Америка се планирани за крајот на 2025-та година, додека масовното производство се очекува следната година.
