Обично очекуваме најпродаваните автомобили во европските земји да бидат модели како Дачија Сандеро, Рено Клио или некој мал теренец. Сепак, не сите земји се исти, ниту пак живеат на ист начин.
Со околу 80.000 жители, Андора е десеттата најмала земја во светот по население и петнаесеттата најмала по површина. Но исто така, таа е исклучително богата.
Само 10 проценти од данокот на доход се плаќа во Андора, па затоа привлекува богати жители кои не сакаат да плаќаат високи даноци во други земји. Ова значи дека пазарот на автомобили во Андора е значително различен од остатокот од Европа, пишува Ревијахак.
Според индустрискиот аналитичар Фелипе Муњоз, најпродаваниот автомобил во Андора во 2024 година бил Porsche 911.
На второ место е спортската Toyota GR Yaris, што одговара на конфигурацијата на патиштата во Андора – полна со кривини и планински превои.
Третото и четвртото место ги држат и моделите на Porsche – Cayenne и Macan, додека Cupra Formentor е на петтото место.
Веднаш по нив доаѓаат „понормални“ автомобили како што се Seat Arona и Hyundai i20, на шестото и седмото место.
Минатата година, во Андора беа продадени 83 примероци од Porsche 911, што беше доволно за првото место на листата на најпродавани модели, со оглед на тоа што во земјата се продале вкупно 2.379 нови автомобили во текот на целата година.
