Изградбата на сопствен дом за многумина е најголемата животна инвестиција, но и најголем финансиски предизвик. Често оваа авантура завршува со големи долгови, кредити кои се отплаќаат со децении и соочување со огромен стрес.
Но, постои алтернативен начин кој овозможува куќата да се изгради во фази, со помалку ризик и без притисок на огромни долгови.
Борис Петрушев, архитект од Скопје со долгогодишно искуство во изградба на семејни куќи, смета дека најдобриот пристап за изградба без долгови е темелно планирање на проектот и негово реализирање на етапи.
„Првата работа што ја советувам на моите клиенти е да направат реален и детално пресметан буџет за целиот проект. Потоа, проектот го делиме на фази, како темели, карабина, фасада, кров, па дури на крај и ентериерот. Така луѓето нема да се изложат на големи финансиски обврски одеднаш“, вели Петрушев.
Фазната изградба значи дека куќата се гради според моменталните финансиски можности на инвеститорот, а секоја фаза е независна и не го блокира проектот доколку дојде до краткотрајни финансиски проблеми.
Сопружниците Ана и Коста Петревски неодамна почнаа да го применуваат токму овој принцип. Нивната куќа во населбата Радишани ја градат веќе трета година и моментално се на етапата поставување прозорци и врати.
„Не брзаме, и тоа е нашето најголемо олеснување. Секоја година вложуваме по неколку илјади евра, онолку колку што сме заштедиле. Изградбата во фази ни овозможи да не се задолжуваме и да немаме чувство на постојан финансиски притисок“, објаснува Ана.
Економистите посочуваат дека токму ваквиот начин на изградба има огромна економска логика. Според нив, клучот за успешно избегнување долгови е трпеливоста.
„Изградбата во фази е одличен начин да се избегне подигнување голем кредит. На овој начин, граѓаните можат подобро да ги контролираат трошоците и да ја намалат можноста за финансиски проблеми, особено во непредвидливи периоди како сегашниот“, велат познавачите.
Експертите се согласни дека темелното планирање, разумното инвестирање и фазната изградба се идеален рецепт за изградба на куќа без да се ризикува финансиската стабилност.
Иако изградбата можеби ќе трае подолго, психолошкото олеснување и избегнувањето долгови го прават целиот процес многу поквалитетен и помалку стресен.
Б.З.М.
