Лагард оди во Давос? Ова се планира веќе неколку години

Претседателката на Европската централна банка (ЕЦБ), Кристин Лагард, може да ја напушти оваа позиција пред крајот на нејзиниот мандат за да го преземе раководството на Светскиот економски форум во Давос, изјави основачот на форумот, Клаус Шваб.

Тој изјави за Фајненшл тајмс (FT) дека последен пат се сретнал со Лагард на почетокот на април во Франкфурт, за да разговараат за транзицијата на лидерската позиција на Светскиот економски форум.

Шваб наведува дека Лагард би можела да ја преземе таа позиција најдоцна на почетокот на 2027 година и дека го планирал нејзиното доаѓање „веќе неколку години“.

Мандатот на Кристин Лагард како претседател на Европската централна банка истекува на крајот на октомври 2027 година.

Клаус Шваб, исто така, изјави дека веќе е обезбеден стан за Лагард во Вила Мунди во Женева, каде што се наоѓаат административните простории на форумот.