За оние кои ќе патуваат на Халкидики: Бидете внимателни, особено во близина на плажите и одморалиштата

Сезоната во Грција полека наближува, па туристите мора да бидат запознаени со новите правила, но и да ги запомнат старите. Оваа година, на Халкидики нè очекуваат некои новости.

Важно известување за сите што планираат да ја посетат Касандра оваа година – првиот крак на Халкидики. Ова лето, на Касандра се очекуваат зголемени сообраќајни контроли, со присуство на дополнителни полициски патроли на главните патишта и на најпосетуваните места. Покрај редовната контрола на брзината, фокусот ќе биде и на тестирањето за алкохол кај возачите, како и на казнувањето на нелегалното паркирање – особено во близина на плажите и во строгите центри на одморалиштата, според Инстаграм профилот на Nikana.gr.

Новина оваа сезона е воведувањето на пајак-служба, која ќе ги отстранува возилата паркирани на забранети места, па затоа се препорачува посебна претпазливост при оставање автомобил.

– Како што ни кажаа локалните жители, сите овие мерки се воведуваат за да се зголеми безбедноста и да се направи сообраќајот понепречен во текот на шпицот на сезоната. Доколку планирате да го поминете летото на Касандра, имајте предвид дека толеранцијата ќе биде значително помала отколку во претходните години – се наведува на страницата Nikana.gr.