Во време кога инфлацијата ја јаде секоја заштедена паричка, сè повеќе граѓани се свртуваат кон дигиталната економија како начин за дополнителна заработка.
Но, можеби најчестото прашање е – дали навистина може да се започне онлајн бизнис со само 500 евра? Одговорот е: да, но со внимателно планирање и многу личен ангажман.
„Онлајн продавницата не бара скапа локација или вработени. Треба да знаете што продавате, кому и како ќе допрете до таа публика“, вели Дамјан Арсов, дигитален маркетер кој консултира мали бизниси.
Според него, 500 евра се доволни за старт доколку фокусот е ставен на „lean“ модел – минимални трошоци, максимална ефикасност.
Првиот чекор е изборот на ниша. Најдобро е тоа да биде производ што лесно се складира дома, има добра маржа и се бара на пазарот.
Пример се природна козметика, додатоци за слабеење, рачно изработени производи, бижутерија, органски чаеви или пак, употребувана облека и книги.
Потоа, следува креирањето на онлајн продавницата. Бесплатните платформи како Shopify (со пробен период), Ecwid, BigCartel или дури и Facebook Shops овозможуваат почеток без високи трошоци.
За оние со малку техничко знаење, WordPress со WooCommerce е најфлексибилна, а потребен е само хостинг од околу 50 евра годишно.
Од буџетот, најголемиот дел – околу 200-250 евра – треба да се насочи кон почетна набавка на производи или материјали. Доколку сами ги изработувате производите, трошокот може да биде дури и помал.
Рестот од парите треба да се инвестира во маркетинг – претежно на социјалните мрежи. „Со само 5 евра дневно може да се добие солидна видливост на Facebook и Instagram, ако добро се таргетира публиката“, вели Кристина Илиевска, сопственичка на мала онлајн продавница за женски аксесоари.
Таа додава дека во првите 2 месеци сè сама правела – од фотографирање до одговарање на пораки.
Дополнителна вредност даваат кратки видеа и reels, кои може бесплатно да се направат со мобилен телефон. Според истражувањата, тие имаат најдобар органски дострел.
За крај, не заборавајте на логистика. Договор со поштенска служба, транспарентни услови за достава и поврат, како и комуникација со клиентите – тоа се темелите на долгорочно успешно онлајн присуство.
„500 евра не се многу, но се доволни ако знаете зошто почнувате и сте подготвени да вложите труд. Денес, од дома може да се изгради сериозен бренд. Само треба да се почне“, вели Александар Велинов, кој веќе трета година живее од својот онлајн бизнис.
Б.З.М.
