По секое поголемо ажурирање, ги скенираме уредите за нови опции. Сепак, некои забележаа непријатно изненадување во форма на порака „Unknown Part“ по надградбата на iOS 18.5.
Иако за многумина изгледа збунувачки и алармантно, оваа порака има логично објаснување. Функцијата не е нова – „Apple“ ја воведе проверката за делови што не се фабрички инсталирани со iOS 15.2 уште во 2021-ва година.
Сепак, многу корисници сега го забележуваат тоа за прв пат бидејќи iOS 18.5 очигледно ги проверува компонентите поагресивно отколку порано.
Причини за пораката „Unknown Part“
Пораката „Unknown Part“ значи дека вашиот „iPhone“ не може да ги препознае сите делови што ги имал кога бил нов. Ова не значи автоматски дека користите лажни или неисправни делови, но укажува дека уредот е отворен за сервис или содржи резервни компоненти кои не се сертифицирани од „Apple“, објавува „MacObserver“.
Најчеста причина е замена на делови што не се оригинални од „Apple“. Во такви случаи, „iPhone“ нема да може да ги идентификува како официјални, што може да резултира со губење на одредени функционалности, како што се „True Tone“ дисплејот, „Touch ID“, „Face ID“ или прикажување на информации за состојбата на батеријата.
Интересно е што пораката може да се појави дури и ако се инсталирани оригинални делови од Apple, но не во овластен сервисен центар. Ова често е случај кога независните сервиси користат делови од други, оштетени уреди. Потоа е потребно рачно да се калибрира заменетиот дел преку опција во поставките на уредот.
Во најретките случаи, ако сте купиле сосема нов „iPhone“ во запечатена кутија и ја добиете оваа порака, тоа може да биде резултат на софтверска грешка или дури и знак дека уредот претходно бил отворен или сервисиран без овластување. Во овој случај, се препорачува веднаш да го вратите уредот ако сè уште сте во рамките на гаранцијата или периодот на враќање.
Како да се реши проблемот
Решението зависи од специфичната ситуација. Ако сте инсталирале оригинален дел, но надвор од сервисниот центар на „Apple“, треба да отворите „Settings“ > „General“ > „About“ > „Parts & Service“, да допрете на „Finish Repair“ и да ги следите упатствата на екранот. Конечно, ќе треба да го рестартирате уредот за правилно да се препознае новата компонента.
Ако се појави предупредување за заклучување на активацијата при обид за калибрирање, тоа значи дека Apple дополнително го заштитил уредот бидејќи се сомнева дека делот доаѓа од украден уред. Во тој случај, единственото решение е да се вратите во сервисниот центар и да побарате да се инсталира друг, отклучен дел.
За жал, ако сте користеле делови од трети страни кои не се оригинални од „Apple“, пораката „Unknown Part“ најверојатно ќе остане трајно присутна. Во овие случаи, „iPhone“ ќе изгуби некои функции што можат да се обноват само со инсталирање на оригинални компоненти.
Иако пораката „Unknown Part“ може да изгледа загрижувачки, во повеќето случаи тоа не значи дека вашиот „iPhone“ е во опасност. Ако користите квалитетни делови од реномирани производители, уредот ќе функционира безбедно, иако можеби со ограничена функционалност.
Најважно е да избегнувате сомнителни услуги и делови од непознато потекло, а доколку сакате целосна компатибилност, секогаш одлучете се за официјални услуги на „Apple“ или оригинални компоненти.
