Податоците од Европскиот завод за статистика – Евростат покажуваат дека во 2023 година, околу 89.000 работници надвор од Европската Унија добиле „сина карта“, односно дозвола за работа и престој за висококвалификувани експерти надвор од ЕУ.
Поголемиот дел од овие дозволи ги издала Германија – дури 69.000, што е 78 проценти од вкупниот број. По неа следува Полска со 7.000 или осум проценти, и Франција со 4.000 или четири проценти.
Индиските граѓани добиле најмногу сини карти – 21.000 или речиси една четвртина од вкупниот број (24 проценти), а интересно е што по нив следуваат руските граѓани со 9.000 или 11 проценти. Исто така, има работници од Турција со 6.000 и од Белорусија со 5.000 дозволи.
Германија е на прво место по „увоз“ на работна сила, како висококвалификувани работници, така и оние што извршуваат едноставни физички задачи.
„На Германија ѝ се потребни работници – најмалку 400.000 годишно. Тоа го велат експертите. Една од можностите овие луѓе да дојдат во Германија е таканареченото „правило за Западен Балкан“. Но, под новата влада на чело со Фридрих Мерц, тоа правило би можело значително да се ограничи“, пишува „Тагескајтунг“.
Во следниот текст, берлинскиот весник потсетува дека врз основа на таа посебна регулатива за Западен Балкан, луѓето од Албанија, Босна и Херцеговина, Црна Гора, Северна Македонија и Србија можат да дојдат во Германија да работат без никакви проблеми. За тоа не им е потребно стручно образование или други квалификации, доволно е да имаат понуда за работа и одобрение од Федералната агенција за труд и вработување. Правилото беше воведено во 2015 година, со цел да се намали бројот на често залудни барања за азил од тие земји и да им се овозможи на луѓето редовен пристап до пазарот на трудот.
Сепак, оттогаш бројот на барања за азил од земјите од Западен Балкан значително се намали. Луѓето од овие области најчесто работат во ресторани и хотели, во градежништвото и во здравството.
На крајот од 2023 година, околу 76.000 граѓани на Албанија, Босна и Херцеговина, Косово, Црна Гора, Северна Македонија и Србија имале работни дозволи во Германија, според веб-страницата „Јоббатикал“, која се занимава со имиграциски теми.
На 1 јануари 2024 година, под водство на Олаф Шолц, Германија ја зголеми квотата за доделување работни визи од 25.000 на 50.000 годишно. Фридрих Мерц беше избран за канцелар во вторникот, па останува да се види во наредните месеци каков потег ќе направи во оваа област, што е многу важно и за Германија и за барателите на работа во оваа земја.
Дозвола за трансфери во рамките на компаниите
Во 2023 година, членките на ЕУ издадоа вкупно 10.800 дозволи за трансфери во рамките на компаниите, што им овозможува на граѓаните кои не се членки на ЕУ да бидат префрлени од компанија што работи надвор од Унијата во филијала во една од земјите-членки.
Најголем број вакви дозволи се издадени во Холандија (2.700 или 25 проценти), Германија и Унгарија (1.900 или 18 проценти секоја), Франција (1.500 или 14 проценти) и Шпанија (1.100 или десет проценти).
Поголемиот дел од овие дозволи се добиени од граѓани на Индија (3.900 или 36 проценти од сите дозволи), Кина (1.600 или 14 проценти) и Јужна Кореја (1.300 или 12 проценти).
САД доделуваат приближно 140.000 имигрантски визи секоја година.
Приближно 140.000 имигрантски визи се достапни секоја фискална година за странци (и нивните сопружници и деца) кои сакаат да имигрираат во САД врз основа на нивните работни вештини. Овие имигрантски визи базирани на вработување се распределуваат меѓу пет преференцијални категории.
Ако имате вистинска комбинација на вештини, образование и/или работно искуство и на друг начин ги исполнувате условите, можеби ќе можете трајно да живеете во Соединетите Држави, според веб-страницата за имиграција.
Некои категории на виза за имигрантски преференции бараат да имате постојана понуда за работа од работодавач во САД. Тој ќе се смета за ваш спонзор/подносител на петиција и ќе ја поднесе петицијата за имиграција до USCIS во ваше име. Доколку не е потребна понуда за работа, можете да поднесете петиција во ваше име, се наведува во условите за аплицирање.
Сегашниот претседател на САД, Доналд Трамп во неговата изборна кампања не беше особено поволен за оние кои ќе си ја пробаат среќата на деловно и лично ниво во САД, а ова особено се однесуваше на граѓаните на Мексико. Некои од извршните наредби на Трамп беа потпишани за да се прошири можноста на Службата за имиграција и царина (ICE) да апси и притвора нелегални мигранти на американска територија, објави Би-Би-Си.
Една од нив ја менува долгогодишната политика со која се забрануваа рациите за имиграција во областите што се сметаат за „чувствителни“, како што се училиштата, болниците и црквите.
