Трговците во најголемите инвестициски банки во Европа ги објавија своите најдобри резултати во последната деценија во првиот квартал од оваа година, благодарение на нестабилноста на финансиските пазари и интензивното тргување предизвикано од потезите на американскиот претседател Доналд Трамп во врска со царините.
Швајцарската UBS, француските банки BNP Paribas и Societe Generale, британската Barclays и германската Deutsche Bank заедно остварија приход од 13 милијарди евра од тргувањето со акции и обврзници. Ова е нивниот највисок заеднички приход од 2015 година, објавува „Фајненшл тајмс“.
Банкарските групации од Wall Street исто така беа многу успешни, заработувајќи вкупно речиси 37 милијарди долари од тргување во истиот период.
Откако дојде во Белата куќа во јануари, Трамп предизвика големи флуктуации во вредноста на акциите, обврзниците и девизниот пазар со својата неизвесна економска политика.
„Нестабилноста на пазарот во голема мера ги поддржува банкарските операции во тој сегмент, како што беше случајот и со нас“, рече главниот извршен директор на банката Societe Generale, Славомир Крупа.
Во првиот квартал, приходите на UBS во трговскиот сегмент се зголемија на годишна основа за речиси една третина, достигнувајќи 2,3 милијарди евра. Најголемата француска банка BNP Paribas забележа рекордни квартални приходи од 2,8 милијарди евра.
„Deutsche Bank“ повеќе не работи со акции, но нејзините приходи од тргување со обврзници, валути и стоки пораснаа за 17 проценти, додека кај „Barclays“ тој раст изнесуваше 21 процент. Во овој сегмент, тие ги надминаа американските конкуренти.
„Societe Generale“ беше претежно фокусирана на тргување со акции, каде што нејзините приходи се зголемија за повеќе од една петтина на 1,06 милијарди евра.
По долг период на слаби приноси и дивиденди за акционерите, европските банки доживуваат бизнис бум во последните месеци благодарение на повисоките каматни стапки и нестабилноста на пазарот што се случува уште од пандемијата, а потоа и од енергетската криза.
До овој квартал, рекордниот период за заработка од трговија во претходните десет години беше првиот квартал од 2022 година, кога вкупната добивка на гореспоменатите банки изнесуваше 12,8 милијарди евра, објавува.
„Credit Suisse“ беше исто така многу важен играч во овој сегмент од банкарското работење.
Главниот извршен директор на UBS, Серџо Ермоти, изјави дека на почетокот на вториот квартал, откако Трамп објави реципрочни тарифи, пазарната активност останала висока, при што обемот на тргување ги надминал врвовите на пандемијата за 30 проценти во некои денови.
Аналитичарот на „Citigroup“, Ендру Кумбс, смета дека се очекуваат добри заработки и во вториот квартал. Сепак, тој предупредува на изјавата на Ермоти дека кај инвеститорите веќе се чувствува одреден замор, што укажува на постепена нормализација на пазарните трендови.
