На крајот на четвртиот квартал од 2024 година, јавниот долг на еврозоната изнесуваше 87,4 отсто од нејзиниот бруто домашен производ (БДП), што е благо намалување од претходниот квартал кога долгот беше 88,1 отсто од БДП.
Оваа информација доаѓа од извештајот на Евростат, во кој се наведува и дека јавниот долг на Европската унија на крајот на истиот период достигнал 81 отсто од БДП, што бележи намалување во однос на третиот квартал кога долгот изнесувал 81,6 отсто од БДП. На годишна основа, јавниот долг на еврозоната незначително се зголеми во однос на четвртиот квартал од 2023 година, кога изнесуваше 87,3 отсто од БДП, додека во Европската унија долгот на крајот на 2023 година изнесуваше 80,8 отсто од БДП.
Најзадолжени и најмалку задолжени земји
Во анализата спроведена од експерти, најзадолжени земји на Европската унија во четвртиот квартал од 2024 година се Грција со алармантни 153,6 отсто од БДП, потоа Италија со 135,3 отсто, Франција со 113 отсто, Белгија со 104,7 отсто и Шпанија со 101,8 отсто.
Овие податоци укажуваат на сериозни фискални предизвици со кои се соочуваат овие земји. Од друга страна, најмалку задолжени земји се Естонија, чиј национален долг изнесува само 23,6 отсто од БДП, Бугарија со 24,1 отсто и Луксембург со 26,3 отсто. Оваа разлика во нивото на задолженост меѓу земјите-членки на Европската Унија јасно ги покажува економските разлики на континентот.
Според податоците на Евростат, во 16 земји од Европската унија е забележан годишен пораст на државниот долг во однос на четвртиот квартал од 2023 година, додека во 11 земји-членки е забележан пад.
Најголем раст на јавниот долг од година во однос на БДП е забележан во Романија со 5,9 отсто, Полска со 5,7 отсто и Финска со 4,5 отсто. Од друга страна, најзначајно намалување на задолженоста има во Грција со 10,3 отсто, на Кипар со 8,6 отсто и во Хрватска со 4,3 отсто.
