Во време кога инфлацијата станува секојдневие, а животниот стандард постојано се лизга надолу, сè повеќе граѓани се обидуваат да штедат – некој со скратување на оброците, некој со избегнување кафулиња, а некој и со „генијалната“ одлука да купува работи на попуст кои не му требаат.
Но дали навистина штедиме – или само си го лажеме паричникот?
Истраживме неколку од најчестите иронични практики на „штедење“ кои во реалноста значат токму спротивното – редовно фрлање пари.
1. Купуваш на попуст – ама тројно
Купи две, добиј едно бесплатно. Или уште подобро – купив нешто што никогаш нема да го носам, ама беше 70% поевтино!
„Мислев дека правам супер зделка кога купив три пара панталони за 1.500 денари“, раскажува Славица М., вработена во администрација. „После шест месеци, сè уште стојат со етикета“.
Ете ти штедење – пари дадени за нешто што нема функција.
2. Возиш до друг град за поевтин бензин
Ова е класика. Ги знаеш тие луѓе што ќе потрошат 400 денари за да заштедат 200 на полнење гориво.
„Имам пријател кој вози до друг град, затоа што таму бензинот е 3 денари поевтин по литар“, вели Александар Т., таксист од Скопје. „Ама не пресметува дека само патот до таму и назад веќе ја поништува заштедата“.
Убаво е што сакаме да бидеме паметни, ама не е лошо и да пресметаме.
3. Купуваш евтино – купуваш двапати
Понекогаш тоа што е „евтино“ излегува најскапо.
„Купив тостер за 800 денари и се расипа за два дена. Потоа купив друг за 1.200 денари и тој исто. На крај земав еден за 4.500 денари и конечно работи“, раскажува Гордана С., средовечна жена од Битола.
Поевтиното не е секогаш економично. Понекогаш е само пат до фрустрација – и дополнителен трошок.
4. Го користиш автомобилот за сè – и за две улици подолу
Мислиш дека штедиш време? Во реалност, трошење гориво за мали релации е тивок убиец на буџетот.
„Во мојата зграда има жена што со кола оди до трафика, а трафиката е на 3 минути пеш“, се смее Љупчо П., пензионер. „Па после се чуди зошто троши по 8.000 месечно на бензин“.
Чекорите се бесплатни – и здрави. Колата не е продолжение на твоите нозе.
5. Правиш „економски“ ручек – па нарачуваш пица навечер
Кога ќе се одлучиш да „штедиш“ со скромен ручек од тестенини и јајца, ама вечерта поради глад и фрустрација ќе нарачаш храна од 600 денари – тогаш не штедиш, туку само го одложуваш трошокот.
„Често се случува да кажам – ќе јадам нешто лесно дома, па вечерта да ми стигне доставувачот на храна“, признава Мартин С., млад ИТ стручњак.
Штедењето значи планирање, не импровизација со последици.
Б.З.М.
