Претседателот на Федералните резерви на САД, Џером Пауел, изјави дека во сегашната ситуација на неизвесност, додека ниту ФЕД, ниту остатокот од светот не знаат во која насока ја води економијата американскиот претседател Доналд Трамп, не е време централната банка да интервенира за да го спаси пазарот што паѓа.
ФЕД не брза да ги намали каматните стапки, иако буџетите на домаќинствата се намалуваат, а реалните ризици за економската активност растат, нагласи Пауел.
„Многу се чека и гледа, и се чувствува како правилна одлука во време на зголемена неизвесност“, рече Пауел, јасно ставајќи до знаење дека ФЕД нема брзо да ги намали каматните стапки освен ако не постои јасна причина за итен одговор, пренесува Ројтерс.
Податоците објавени во петокот покажаа дека вработувањата останаа силни во март, иако Пауел истакна дека тие бројки биле собрани пред објавувањето на тарифите од страна на Трамп. „Во моментов не е јасно кој е вистинскиот пат за монетарната политика. Ќе треба да почекаме и да видиме како ќе се развиваат работите“, рече претседателот на ФЕД.
Движењето на цените на акциите може да влијае на економијата преку промени во богатството на домаќинствата и очекувањата на потрошувачите, но првите неколку недели од мандатот на Трамп донесоа толку многу хаос и конфликтни сигнали дека ФЕД е во парализа. Во сегашната состојба на неизвесност, Пауел рече дека ова не е време за „Fed put“, термин на Wall Street за интервенција на централната банка за спас на пазарите додека акциите паѓаат.
Во современото централно банкарство, постои правило за брзо и одлучно дејствување кога проблемот е јасен. Исто така, стана клучно да се избегнат потези кои подоцна ќе треба да се поништат. Тоа е ризикот што ФЕД би го презел доколку предвреме ги намали каматните стапки, додека во исто време постои закана од пораст на инфлацијата, што би можело да предизвика спротивна реакција.
Претставниците на ФЕД нема да бидат подготвени да признаат дека го користат „Fed Put“ како алатка, но Wall Street верува дека постои веќе четири децении. Терминот е измислен откако тогашниот шеф на ФЕД, Алан Гринспен, ги намали каматните стапки во 1987 година по „црниот понеделник“ на берзата. Неговите наследници ја продолжија практиката на спасување пазари преку интервенции.
ФЕД нагло ги зголеми каматните стапки од 2022 година за да ја ограничи инфлацијата, а потоа ги намали за еден процент минатата година бидејќи инфлацијата почна да се намалува. Сега, со новите увозни царини и можните фискални и даночни промени, решија да почекаат и да си одвојат време. Банката на федерални резерви сега е заглавена помеѓу можното економско забавување и порастот на инфлацијата предизвикана од тарифите, поради што останува на страна.
Американските берзански индекси во четвртокот минатата недела забележаа најголем дневен пад во последните години. Според податоците, S&P 500 падна за 4,85 отсто, Nasdaq Composite загуби 5,99 отсто од вредноста, додека Dow Jones Industrial Average ослабе за 3,98 отсто. Следните денови се очекува да бидат полни со нестабилност бидејќи пазарите се прилагодуваат на целосното влијание на економските потези на Трамп.
