Состојбата со најновите царини воведени од САД е премногу нова и динамична, не е ни јасно како точно ќе се применуваат царинските такси. Самата американска администрација најверојатно ќе го измени својот пристап со текот на времето, но брзата „ренесанса“ на американската автомобилска индустрија преку такви мерки е нереална. Хаосот е огромен и неговите ефекти нема да бидат позитивни во веќе многу проблематичната автомобилска индустрија.
Според експертите, последиците од царините се од големи размери. Целата индустрија – и во САД и во Европа – во моментов се обидува да разбере каков ќе биде вистинскиот ефект, бидејќи САД не се само значаен пазар, туку и клучен производител и снабдувач.
Тие додаваат дека децениските наталожени проблеми во американскиот автомобилски сектор нема да се решат со еднократна царинска мерка.
„Дури и ако краткорочно се зголеми продажбата, како што се случи во март, вистинскиот ефект ќе биде опипливо зголемување на цената на финалниот производ – според различни проценки и до 10.000 долари по автомобил. Ова зголемување на цените на автомобилите ќе влијае на сите пазари – не само во САД и Европа“, вели експертите.
Тие сметаат дека царините за автомобилите ќе пуштат нова инфлаторна спирала. А кога производот ќе поскапи, потрошувачката се намалува. Така ефектот нема да биде одржлив.
„Нето крајниот резултат на тарифите е зголемување на трошоците за водење бизнис, што го прави крајниот производ поскап. На крајот, потрошувачите ќе бидат тие што ќе ја платат сметката“, сметаат економистите.
Во исто време, европските производители се под двоен притисок – од Северна Америка и од Кина. Соговорникот рече дека на европските брендови ќе им биде тешко да ги надоместат загубите од САД преку поголема локална продажба бидејќи европскиот пазар се уште не е целосно закрепнат од пандемијата, а стандардите во САД и Европа се различни, што го прави невозможен директен трансфер на модели меѓу двата пазари.
Во меѓувреме, компании како „Volkswagen“ се обидуваат да го вратат пазарниот удел во Кина преку заеднички вложувања со локални производители, откако беа истиснати од евтините локални електрични автомобили.
„Ние сме доведени во ситуација да немаме друг избор освен да соработуваме со Кина, бидејќи тие имаат технологија, евтина работна сила и суровини. Сите тие се интегрирани во локализиран синџир на снабдување, што ги прави исклучително конкурентни“, велат експертите.
