Македонија си доби 33 отсто повисоки царини од стратешкиот партнер САД. Нови повисоки царини има за поголемиот дел од трговските соработници на најмоќната држава во светот. Оваа промена на надворешната трговија беше најавена уште со самото доаѓање на Доналд Транп на претседателското место во САД. Ваквиот потег наиде на жестоки реакции на глобално ниво. Сега на потег се засегнатите страни, пред се Европската унија и Кина.
Допрва ќе се анализира и пресметува колкави ќе бидат загубите и финансиските компликации по објавата на новите такси кои САД ги наметнува за македонските производи. Засега не може точно да се одговро на прашањето дали ќе биде исплатливо да се тргува со САД и на кое ниво ќе бидат конкурентни македонските производи во најмоќната држава.
Од друга страна Европската унија која доби за 20 отсто повисоки царини од Трамп ги квалификува како тежок удар за глобалната економија. Сега од унијата велат дека подготвуваат контрамерки доколку одлуката не биде поништена. Информациите од официјален Брисел велат дека веќе се финализира првиот пакет контрамерки како одговор на царините за челик.
Веќе е познато дека и Кина најави контра мерки, а овие тарифи ги нарече „самоуништувачко насилство“ и го обвини Трамп дека „трговијата ја претвори во крајно поедноставена игра на одмазда“. Кина е можеби најтешко погодена од соопштението на Трамп, бидејќи е воведена дополнителна царина од 34% за сите кинески стоки – покрај постојните 20%.
И нашиот северен сосед, Србија не помина добро. Србија доби највисока царина во однос на земјите од опкружувањето, односно 37 отсто. Босна и Херцеговина доби 35 отсто повисоки царини. Косово доби 10 отсто повисоки царини.
Од самиот страт, откако Трамп е на тронот неговиот рејтинг е во надолна линија. Последните податоци од анкетите велат дека во моментов неговиот рејтинг е паднат на 43 отсто, и е досега на најниско ниво по враќањето на претседателското место на САД.
Анкетите велат дека 52 проценти oд оние кои се изјаснилевелат дека зголемувањето на тарифите за автомобили и автоделови, мерки вклучени во новите широки тарифи на Трамп кои ги објави синоќа, ќе им наштетат на луѓето околу нив, а приближно истиот дел веруваат дека зголемувањето на царинските стапки ќе има негативно, а не позитивно влијание. Околу една третина – главно поддржувачи на републиканците – имаат спротивен став.
И.П
