3 април, 2025
ПочетнаЕКОНОМИЈАГенерацијата Z ја презема контролата на пазарот на труд - колкава плата...

Генерацијата Z ја презема контролата на пазарот на труд – колкава плата очекуваат младите?

Новата генерација која чекори на пазарот на трудот, популарната генерација Z, значително ги менува условите кои компаниите мора да ги понудат за да привлечат млади и перспективни кадри.

Она што особено ја разликува оваа генерација од претходните е нивната јасна визија за тоа што сакаат, особено кога станува збор за платите.

Истражувањата и искуствата покажуваат дека младите луѓе на возраст помеѓу 18 и 25 години имаат значително повисоки очекувања од работодавачите во споредба со нивните претходници.

Додека претходните генерации се задоволуваа со пониски почетни плати во замена за сигурност и можности за раст, генерацијата Z не се плаши директно да бара повисоки примања уште при првото вработување.

Јована Станојковска, менаџер за човечки ресурси во една македонска ИТ-компанија, вели дека ова е генерација која добро ја знае својата вредност.

„Кога разговараме со кандидатите од генерација Z, нивното барање за плата не е нејасно, туку многу прецизно и директно. Често пати барањата се движат од 600 до 900 евра, па и повеќе, за почетни позиции. Тоа е голема промена, но истовремено и предизвик за компаниите“, вели Станојковска.

Причината за ваквите барања делумно лежи во нивната способност брзо да стекнуваат нови вештини, особено во дигиталниот свет.

Тие растеле со интернетот и технологијата, па нивната адаптивност кон новите технологии е на завидно ниво, што ги прави вредни за работодавачите.

Жарко Попоски, 23-годишен студент кој неодамна дипломирал, вели дека младите денес не сакаат да се задоволат со минимални плати и лоши услови.

„Ние сме свесни дека светот брзо се менува и сакаме пристојна плата од самиот старт. Ако компанијата може да ги препознае нашите таленти и да ни обезбеди добри услови, подготвени сме целосно да се посветиме“, вели Попоски.

Компаниите, пак, веќе почнуваат да сфаќаат дека за да ги привлечат најдобрите таленти, ќе мора да го променат традиционалниот пристап.

Според економските аналитичари, ваквите промени се неизбежни и позитивни.

„Работодавачите мора да бидат флексибилни и да инвестираат повеќе во младите луѓе. Високата плата за генерација Z не е само луксуз, туку и мотивација да останат во земјата и да придонесат за развој на домашниот пазар“, истакнуваат експертите.

Иако засега разликата помеѓу очекувањата и реалноста е голема, јасно е дека младите луѓе кои доаѓаат ќе направат сериозна револуција на пазарот на трудот, каде платата ќе биде клучна, но не и единствена мерка за нивното задоволство.

Б.З.М.

НАЈНОВИ ВЕСТИ

ХОРОСКОП