Главниот проблем со брзото прифаќање на електричните автомобили ширум светот е нивната висока цена. Не е тајна дека електричното возило обично е многу поскапо од она со мотор со внатрешно согорување. Развивањето на таканаречените автомобили со нулта емисија не само што е скапо, туку и комплицирано, со оглед на геополитиката на компонентите на батериите, пишува Фелипе Муњоз, аналитичар во „JATO Dynamics“, во анализа за „Motor 1“.
Како резултат на тоа, голем дел од напорите на производителот и вниманието на јавноста се фокусирани на крајната цена на електричните автомобили (познати и како електрични возила со батерии, BEV). Ова е клучен елемент кој ја одредува дистрибуцијата на овие возила.
За жал, нарушувањата создадени од владините стимулации и трговските тарифи ги комплицираат напорите за намалување на цената. Сепак, досега е постигнат одреден напредок. Според најновата студија на „JATO Dynamics“, просечната малопродажна цена (без стимулации и попусти) на електричен автомобил во Европа (еврозона) е намалена за 11% (цените приспособени за инфлација) помеѓу 2018-та и 2024-та година. Во САД, намалувањето е уште поголем, со пад од 26% во истиот период.
Добрата вест доаѓа во време кога цените на автомобилите со мотор со внатрешно согорување (ICE) се зголемени. Во еврозоната, на пример, бензинските, дизелските и благите хибридни автомобили ја зголемија својата просечна цена за 7% помеѓу 2018-та и 2024-та година. Така, разликата во цените помеѓу „BEV“ и „ICE“ падна од 42% во 2018-та година на 19% во минатата година. Иако 19% сѐ уште е многу, потрошувачите може да почнат да чувствуваат помали разлики во цените.
Сепак, се чини дека напредокот е прилично бавен и не е јасно дали падот на цените на електричните автомобили е последица или причина за зголемената побарувачка за овие возила. И покрај тешкотиите со кои се соочуваат и се подолгата временска рамка за целосна транзиција, електричните возила се тука да останат. Тие се суштински дел од идните планови и цели на автопроизводителите. Масовно преминување кон нив сè уште не се случило, барем на Запад, со очигледниот и добро познат исклучок на Норвешка, се разбира.
Кина, сепак, раскажува поинаква приказна. Минатата година, продажбата на „BEV“ изнесува околу 51% од вкупниот број на „BEV“ во светот, а причините се прилично очигледни. Економијата на обем и сигурноста во производството на компоненти за батерии им овозможија на кинеските производители на автомобили да ја намалат конечната цена на нивните сè поконкурентни електрични автомобили. Всушност, Кина направи толку многу за толку кратко време што позитивната приказна за падот на цените на Запад се чини дека е бледа во споредба со она што клиентите плаќаат за електричен автомобил таму.
Денес во Кина можете да купите сосема нов „BEV“ за само 3.250 евра или 3.450 долари. Просечната малопродажна цена на електричните автомобили достапни на пазарот е 29.682 евра (31.400 долари). Тоа е околу половина од цената во Европа и САД, кои значително заостануваат зад Кина кога станува збор за електричните автомобили. Сè додека не го обезбедат синџирот на снабдување за производство на сопствени батерии, на производителите надвор од Кина ќе им биде тешко да манипулираат со цените. Сепак, воведувањето на подостапни модели кои ќе се појават на пазарот во 2025-та година најверојатно ќе продолжи да ја намалува цената и да ја доближи барем до она што моментално го плаќате за автомобил со внатрешно согорување.
