Италијанската премиерка Џорџа Мелони вчера пристигна во Флорида за да се сретне со новоизбраниот американски претседател Доналд Трамп, во обид да ги зајакне врските со него пред неговата инаугурација на 20 јануари.
Вработените во одморалиштето Мар-а-Лаго на Трамп и дадоа овации на Мелони откако новоизбраниот претседател ја претстави, според видеата споделени на социјалните мрежи.
Нејзиното патување доаѓа неколку дена пред средбата со американскиот претседател Џо Бајден, кој треба да го посети Рим од четврток до 12 јануари. Трамп го победи Бајден на ноемвриските избори и се подготвува да се врати во Белата куќа.
Иако деталите за нивната средба не беа објавени, Мелони – според пишувањата на италијанските медиуми – планирала да разговара со Трамп за руската војна во Украина, трговските прашања, Блискиот Исток и италијанскиот новинар затворен во Техеран. Канцеларијата на Мелони одби да ги коментира извештаите.
Мелони се смета за потенцијално клучен партнер за Трамп во Европа со оглед на нејзината конзервативна агенда и стабилноста на десничарската коалиција што ја предводи во Италија. Таа, исто така, создаде блиска врска со милијардерот Илон Маск, близок сојузник на Трамп кој потроши повеќе од четвртина милијарда долари за да му помогне да победи на изборите.
-Ова е многу возбудливо. Овде сум со фантастична жена, премиерката на Италија“, им рекол Трамп на толпата во Мар-а-Лаго, според извештаите на медиумите. „Таа ја освои Европа“.
Еден од најголемите предизвици со кои се соочува Мелони е апсењето на италијанската новинарка Сесилија Сала во Иран на 19 декември.
Сала беше приведена три дена откако Мохамед Абедини, ирански бизнисмен, беше уапсен на аеродромот во Малпенса во Милано, по налог за апсење на САД, за наводно снабдување со делови за беспилотни летала, за кои Вашингтон вели дека биле користени во нападот во 2023 година во кој загинаа тројца членови на американската војска во Јордан. Иран негираше вмешаност во нападот.
Мелони е последната во низата странски лидери кои го посетија Трамп на Флорида по изборите на 5 ноември. Покрај неа, тој се сретна и со аргентинскиот претседател Хавиер Милеи, унгарскиот премиер Виктор Орбан и канадскиот премиер Џастин Трудо.
