Во Метрополис арената на Скопски саем од денеска почнува 3. Саем на турски извозни производи што го организира Меѓународната саемска организација „Меридијен“ и Стопанската комора на Македонија – Турција (МАТТО).
Посетителите ќе имаат можност до сабота да ги видат производите на околу 40-тина турски компании од областа на текстилот, козметиката, земјоделството, логистиката, туризмот, градежништвото, образованието… Половина од компаниите веќе се присутни или го имаат истражено пазарот во Македонија, а половината првпат ќе се претстават пред македонските потрошувачи.
Свој штанд ќе имаат и Трговската комора на Ескишекир и Стопанската комора на Македонија – Турција (МАТТО).
Саемот ќе биде отворен од 10 до 18 часот, а влезот е слободен. Минатата година саемот го посетиле 8.000 луѓе, а годинава организаторите очекуваат поголема посетеност.
Турција е еден од 10-те трговски партнери на Македонија. Трговската размена меѓу Македонија и Турција е во постојан подем и во првите осум месеци од годинава забележан е раст на трговската размена од околу 10 проценти во споредба со истиот период лани.
Се очекува трговската размена до крајот на годината да достигне до 400 милиони долари.
