Европската комисија ја намали проценката за пад на хрватската економија во оваа година од 1,0 на 0,7 проценти, но ја зголеми проценката за државниот дефицит и јавниот долг.
Во следната година, според проценката на Комисијата, хрватскиот бруто домашен производ (БДП) би требало да се зголеми за 0,5 проценти, а во 2015 година за 1,2 проценти.
Во најновата прогноза, Комисијата очекува дека јавниот дефицит на Хрватска ќе изнесува 5,4 проценти од БДП, за разлика од 4,7 проценти кои беа предвидени во претходната прогноза. Во следната година дефицитот најверојатно ќе изнесува 6,5 проценти, додека во 2015 година тој би можел да се намали на 6,2 проценти.
Јавниот долг се очекува во оваа година да изнесува 59,6 проценти од БДП, следната година 64,7, а во 2015 година 69 проценти.