За да си ја обезбедите иднината, да купите нешто вредно или финансиски да се обезбедите за „црните денови“ потребно е да штедите.
Но, за оваа одлука да ја спроведете во дело неопходно е да направите неколку важни чекори, кои ќе ви го олеснат спроведувањето на зацртаните цели.
Направете листа на приоритети
Покрај секоја ставка ставете дали таа е реална потреба или само желба. После тоа, фокусирајте се на потребите. Покрај секоја, ставете реален рок кога би можеле да ја остварите. Бидете реални, не потценувајте, но и не ги преценувајте целите. Оваа листа фотокопирајте ја во повеќе примероци и ставете ја на повеќе видни места.
Делувајте
Кога ќе дефинирате што сакате, преземете акција. Ако вашата реална потреба е летување, напишете ја вкупната сума која би ја издвоиле. Тој износ поделете го на месеци до датумот на кој сакате да патувате и секој месец издвојувајте ја потребната сума, така што на крајот ќе успеете да ги соберете сите пари.
Бидете упорни
И желбата за штедење во банка бара одреден план. Во случај да сте се одлучиле да штедите во банка, најдобро и можеби најлесно е да започнете да штедите од мали суми. Исто така, многу е важно да бидете упорни и да не се откажувате од вашиот план за штедење.
Проверете ги условите
Прво и основно е да се распрашате за условите и видот на штедењето. Вообичаена понуда се штедните влогови на еден месец, три месеци, шест, една година и др. Од видот на штедењето зависи и каматата. Оделни банки нудат посебни пакети за штедење, како што се детските пакети, тие нудат и исплата на каматата однапред и уште многу други поволности.
Безбедноста на прво место
Каматните стапки се разновидни, но тоа што би требало да ве води не е висината на каматната стапка, односно заработката, туку сигурноста и репутацијата на банката.