Европската комисија одлучи, по неколкумесечна истрага и преговори со кинеската страна, да воведе царина за увоз на електрични возила произведени во Кина.
Оваа одлука е донесена и покрај големиот притисок од одредени големи европски производители на возила кои сметаат дека „влегувањето во царинска војна ќе биде погубно за нивниот бизнис и пласманот на автомобили на кинескиот пазар“.
Тарифите всушност стапија на сила на 31 октомври, а беа воведени за период од пет години.
Во образложението на одлуката на Европската комисија, како што информираат од здружението, се наведува дека истрагата утврдила дека кинеските производители имаат предност пред европските поради државните субвенции.
На претходните царински стапки од 10 проценти сега се воведуваат дополнителни царини кои се движат од 7,8 до 35,3 проценти.
Дополнителна царина ќе изнесува 7,8 отсто за возилата на американскиот производител Тесла произведени во Кина, и 17 отсто за кинеските производители BYD, 18,8 отсто за Geely и 35,3 отсто за SAIC.
Дополнителната царинска стапка од 35,3 отсто, како што наведуваат, ќе важи и за сите други производители во Кина кои не сакале да соработуваат во истрагата, а за компаниите кои соработувале ќе биде 20,7 отсто.
Тие потсетуваат и дека Европската комисија во своето соопштение наведува дека „паралелно ќе продолжи да работи со Кина за изнаоѓање алтернативни решенија, компатибилни со правилата на Светската трговска организација и останува отворена за преговори за ценовните обврски со индивидуалните извозници“.
Интересно е, како што додаваат, што конечната одлука за воведување дополнителни царини е донесена дури откако на почетокот на месецов предлогот не го доби потребното квалификувано мнозинство, односно гласовите на најмалку 15 земји-членки во која живее најмалку 65 отсто од населението на ЕУ.
За предлогот на Комисијата беа 10 членови, 12 беа воздржани, а пет беа против, меѓу кои и Германија, известуваат од здружението.
По правило, кога нема квалификувано мнозинство ниту за ниту против предлогот, извршното тело на ЕУ може самостојно да донесе обврзувачка одлука. Истрагата на ЕК покажа дека кинеските производители имаат бројни придобивки – „повластени финансирања и грантови, земјиште, батерии и суровини по цени пониски од пазарните“.
Се чека кинескиот одговор, велат од здружението.
