Најмалку 202 лица загинаа во поплавите во југоисточна Шпанија во најголемата природна катастрофа во земјата од 1973 година.
Се стравува дека бројот на жртвите не е конечен бидејќи се уште трае потрагата по исчезнатите.
„Најважното нешто во моментов е да се спасат што повеќе животи“, рече премиерот Педро Санчез за време на посетата на погодените области.
Надлежните не го прецизираат бројот на исчезнати, но велат дека ги има „многу“.
Најтешко погодени места беа во регионот на Валенсија, каде за осум часа паднаа годишни врнежи од 490 литри на метар квадратен.
Тропските дождови, предизвикани од фронтот на студен воздух кој се движи низ југоисточна Шпанија, предизвикаа поројни поплави кои носеа сè пред себе.
Во погодените подрачја нема струја, патниот и железничкиот сообраќај е во прекин.
Многумина во Шпанија сега се лути на регионалните власти што не предупредуваат за доаѓање на таква катастрофа.
Најмалку 202 смртни случаи беа пријавени во Валенсија, додека уште две беа пријавени во Кастиља-Ла Манча на западниот дел од провинцијата и уште еден во Андалузија.
Во градот Паипорта во Валенсија, каде што се излеа реката, досега се пријавени најмалку 40 смртни случаи.
„Сите знаеме некој кој починал“, рече фармацевтот Мигел Герила, стоејќи пред аптека чиј влез беше покриен со густа кал.
„Ова е кошмар.
Возачите кои се нашле на патиштата и автопатот раскажале за ужасите со кои се соочиле бидејќи водата наишла наеднаш.
Тие скокнале од автомобилот и барале засолниште на мостови или дрвја.
„Водата брзаше по патот како цунами“, рече Гилермо Серано Перез, 21-годишник од Паипорта, предградие на Валенсија.
Тој додаде дека тој и неговите родители морале да скокнат од автомобилот и да се качат на мостот за да не бидат однесени од водата.
Градоначалникот на Хорно де Алседа, град недалеку од Валенсија, изјави за Би-Би-Си дека нивото на водата се зголемило за повеќе од еден метар за само неколку минути.
„Струите беа многу силни и спасувачите мораа брзо да реагираат и да ги извлечат луѓето од автомобилите и куќите“, рече Консуело Таразон.
Медиумите и корисниците на социјалните мрежи ги обвинуваат службите дека предоцна издале предупредувања, а властите не се подготвени за ваква природна катастрофа.
Шпанската метеоролошка агенција издаде предупредување во вторник наутро околу седум часот во кое се наведува дека „опасноста е екстремна“.
„Прогласена е максимална црвена тревога“, истакнаа тие.
Сепак, службата за цивилна заштита издаде предупредување за опасност во вторникот вечерта во 20 часот и 15 минути, кога многу населени места веќе беа поплавени.
„Големината на оваа трагедија го покренува прашањето дали населението било предупредено предоцна: цивилната одбрана испрати предупредување кога водата веќе ги поплавила градовите“, стои во насловот на веб-страницата на водечкиот шпански весник „Ел Мундо“.
Весникот додава дека стотици луѓе ноќта од вторник кон среда ја поминале во индустриски зони или во автомобили на патиштата, бидејќи до вечерта патиштата веќе биле пресечени од водотеци.
„Како градоначалник, никој не ме предупреди дека реката Магре може да се излее од коритата. Но, таа го поплави градот, го покри со кал и ѓубре“, се пожали Андреу Салом, градоначалник на градот Алкулдија.
Гувернерот на провинцијата Валенсија, конзервативецот Карлос Мазон, сега е на удар поради неговата претходна одлука да ја укине службата за итни случаи UVE.
Оваа услуга за вонредни ситуации ја воведе претходната, левичарска влада.
По победата на изборите минатата година, Карлос Мазон веднаш го укина UVE, наведувајќи дека трошоците за одржување на услугата многу ги надминуваат придобивките.
Но, по оваа катастрофа, Мазон и неговата конзервативна партија повторно се на удар на критики за укинување на системот.
Владата на провинцијата Валенсија одговори со изјава дека УВЕ е всушност фиктивна организација: „Нула пожарникари, нула материјална поддршка, нула ефикасност“.
Властите распоредија повеќе од 1.000 војници во средата за да помогнат во спасувањето на луѓето, но многу места се тешко достапни поради поплавените или уништените патишта.
Шефот на Европската комисија Урсула фон дер Лајен изјави дека го активирала сателитскиот систем Коперник за да им помогне на шпанските спасувачки тимови во потрагата по исчезнатите.
Шпанските аналитичари за осигурување на имот предвидуваат дека ова би можело да биде најскапата природна катастрофа во поновата историја на земјата, пренесува El Pais.
Досега најголемите трошоци по природна катастрофа од овој тип беа во 1983 година, кога Баскија беше опустошена од поплави, а загинаа 34 лица.
Тогаш на име на осигурување беа наплатени 977 милиони евра.
„Вакви врнежи не се видени 500 години, но она што се случи во Валенсија можеше да биде полошо“, рече Пилар Гонзалес де Фрутос, која беше задолжена за исплатата на отштетата кога Билбао и околните градови во Баскија беа опустошени од поплавите.
Има клучна разлика помеѓу оваа катастрофа и онаа – сега се возат многу повеќе автомобили, што значи дека товарот на осигурителните компании сега може да биде многу поголем.
Тридневна жалост
Во Шпанија е прогласена тридневна национална жалост.
„Шпанија плаче со вас. Ние сме со вас, нема да ве оставиме“, рече шпанскиот премиер Педро Санчез во телевизиско обраќање.
