И покрај тоа што секоја пролет многу се зборува за крајот на летното сметање на времето, викендов повторно ќе треба да ги вратиме стрелките на часовникот, за да се вратиме на „старото“ зимско сметање на времето.
Иако ова е можеби „попријатна“ промена на часовникот бидејќи ни го продолжува викендот за еден час и ни овозможува да спиеме подолго, многу експерти се согласуваат дека е крајно време да се стави крај на поместувањето на часовниците во која било насока.
Резултатите од бројните студии кои покажуваат дека влијанието на овој систем врз потрошувачката е занемарливо, но дека поместувањето на стрелките може да има здравствени последици за луѓето, не вродија со плод. Се чини дека сè уште нема решеност да се користи зимското сметање на времето во текот на целата година.
Дали ќе го завршиме летното сметање на времето во 2025 година?
И покрај бројните најави дека би можеле глобално да го укинеме овој тренд на поместување на часовникот и јасната желба на луѓето ширум планетата да се ослободат од овој обичај, се чини дека во наредниот период вредно ќе ги поместуваме стрелките напред-назад двапати годишно.
Анкетата од 2022 година покажа дека речиси 80 отсто од Американците поддржуваат промена на сегашниот систем. Еден од пет возрасни изјави дека ритуалот двапати годишно има негативно влијание врз нивното ментално здравје, според истражувањето на Американското здружение на психијатри спроведено во септември.
Европската комисија го претстави својот предлог за ставање крај на поместувањето на часовникот во септември 2018 година по јавната консултација на која огромното мнозинство од 4,6 милиони граѓани на Унијата го поддржа прекинот на оваа практика. Во првата половина на 2019 година пратениците ставија свој печат на тој предлог, но оттогаш ништо не се промени на Стариот континент.
Во изминатата деценија, некои земји ширум светот одлучија да се откажат од сезонската промена на часовниците, додека други земји сè уште се придржуваат до овој принцип. Сепак, нивниот број се намалува.
Анализата од 2023 година на Истражувачкиот центар Pew покажа дека половина од земјите претходно ги практикувале овие промени. Меѓутоа, денес само една третина од земјите сè уште го одржуваат овој обичај.
Поголемиот дел од Соединетите Американски Држави, поголемиот дел од Европа и делови од Канада, Австралија, Јужна Америка, Бразил и Карибите сè уште го прилагодуваат својот часовник. Но, голем број земји ширум светот целосно ја напуштија оваа практика.
Се работи за цела Азија и поголемиот дел од Африка. Во изминатата деценија, Азербејџан, Иран, Јордан, Намибија, Русија, Самоа, Сирија, Турција, Уругвај и поголемиот дел од Мексико ја прекинаа практиката, според Истражувачкиот центар Pew. Во Хаваи и Аризона го прескокнуваат овој обичај, како и Американската Самоа, Гуам, Северните Маријански Острови, Порторико и Девствените Острови на САД.
