Невработеноста останува голем проблем за Европската унија, податоците говорат дека таа цврсто се држи на 11 проценти.
Во земјите кои го користат еврото таа е дури поголема – 12,2 проценти. Најголемата опасност е неваботеноста на младите, бидејќи секој четврти млад човек од 25 години нема работа.
Економскиот раст во тие земји едвај е во плус и до неговото закрепнување ќе поминат уште години. Обидот на владите да ја излечат економијата се однесува на непопуларните мерки, на кои граѓаните се спротивставуваат, како што е примерот во Грција, каде власта го теши својот народ со изјавата „Ако сакаме да биде подобро прво мора да биде полошо“.
Шпанската и португалската влада имаат намера да ја продадат железницата, односно метро компанијата која е во големи долгови, а работниците стравуваат дека приватизацијата значи дека тие ќе останат без работа. Во Лисабон објаснуваат дека тоа е дел од лечењето на економијата.
„Потполно сме посветени да го исполниме економскиот план за спасување. Португалија излегува од рецесија и ние сме во процес на стабилизација на економијата“, изјави министерот за економија на Португалија, Антонио Пиреш де Лима.
Во Франција е спротивно – невработеноста расте и покрај се. Во септември е остварен неславен рекорд со безмалку 3,3 милиони невработени работоспособни лица, што е за осум проценти повеќе во однос на истиот период минатата година.
Работните места дури и на банкарските работници во Италија се знак на прашање. Банките затвораат 3.000 филијали и отпуштаат 19.000 работници.
