„Aston Martin“ помина низ финансиска криза во последната деценија. Но, неодамна, компанијата ги сврте работите под будното око на Лоренс Строл, со одлични нови модели како што се „DB12“, „DBX“ и „Vantage“.
Но, дури и со оваа неодамнешна низа успеси, британскиот производител на спортски автомобили нема да ја постигне целта оваа година.
Во неодамнешното интервју новоименуваниот извршен директор Адријан Халмарк, кој доаѓа од „Bentley“, рече дека „Aston Martin“ оваа година ќе произведе и испорача околу 1.000 автомобили помалку од првично проценетите и нема да може да ја исполни својата цел за годината.
„Aston Martin“ имаше за цел да испорача 7.000 автомобили во 2024-та година, што би било значително подобрување во однос на 6.620 возила што компанијата ги испорача минатата година – но тоа нема да се случи.
„Беше потребно скоро совршено извршување за да се исполни амбициозниот план на компанијата за 2024 година“, рече Халмарк во интервјуто.
„Сепак, стана јасно дека треба да преземеме решителна акција за прилагодување на обемот на производството за 2024 година“, додава тој.
Халмарк ги наведе проблемите со синџирот на снабдување, особено „поплавите“ и „пожарите“ кои зафатија неколку добавувачи на „Aston Martin“ низ Европа.
Поплавите во Швајцарија на почетокот на оваа година го запреа производството во голем снабдувач на алуминиум, што влијаеше и на брендовите како „BMW“, „Jaguar Land Rover“ и „Porsche“.
Следната година, сепак, би можела да биде попрофитабилна за марката, бидејќи во продажба ќе бидат пуштени модели како што се новите „Vanquish“ и „Valhalla“, како и ажурираниот теренец „DBX“.
„Aston Martin“, исто така, ги отфрли своите амбициозни планови за ЕВ и вети дека ќе продолжи да продава автомобили со мотори со внатрешно согорување во 2030-тите, што веројатно ќе ги задржи ентузијастите заинтересирани во следните неколку години.
