Соединетите држави го запленија авионот на венецуелскиот претседател Николас Мадуро и го префрлија од Доминиканската Република во сојузната држава Флорида, утврдувајќи дека неговото купување ги прекршило американските санкции, соопшти во понеделникот американското Министерство за правда, пренесува Хина.
Запленувањето на авионот доаѓа во време на зголемен притисок врз Мадуро во Венецуела и во странство поради спорните избори на 28 јули, на кои тој тврди дека победил, додека опозицијата ги објави своите резултати кои покажуваат дека нивниот кандидат јасно го победил, пренесува Ројтерс.
Мадуро, неговите соработници и клучниот нафтен сектор на Венецуела, членка на Организацијата на земјите извознички на нафта, се под тешки американски санкции, а неговите активности поврзани со изборите ја зголемија можноста за дополнителни мерки.
„Утринава, Министерството за правда заплени авион за кој тврдиме дека е незаконски купен за 13 милиони долари преку фиктивна компанија и прошверцуван од САД за да го користи Николас Мадуро и неговите соработници“, се вели во соопштението на државниот обвинител Мерик Гарланд.
Американските власти рекоа дека заплената, за која првпат објави Си-Ен-Ен, била извршена во тесна соработка со Доминиканската Република.
Владата на Венецуела сè уште не одговорила на барањето за коментар.
