Американскиот потпретседател Камала Харис ја започна својата кампања за претседателските избори со митинг во Висконсин, нејзин прв како претпоставен демократски кандидат откако обезбеди доволно гласови од делегатите за номинацијата.
Се очекува делегатите официјално да номинираат претседателски кандидат на Демократската национална конвенција во Чикаго во август.
На вчерашниот митинг во Висконсин, една од клучните држави за исходот од изборите во ноември, Харис рече дека „патот до Белата куќа минува низ Висконсин“ и вети дека ќе ги обедини демократите.
„Ви ветувам дека во наредните недели ќе продолжам да ја обединувам партијата за да бидеме подготвени да победиме во ноември“, рече Харис, пренесе АП.
Таа нагласи и дека една од целите на нејзиниот мандат, доколку победи на изборите, ќе биде зајакнување на средната класа.
„Ние веруваме во иднина во која секој човек има шанса не само да преживее, туку и да напредува, иднина во која ниту едно дете нема да расте во сиромаштија, каде што секој работник е слободен да се приклучи на синдикатот“, рече Харис.
Таа го нападна и поранешниот претседател и републикански кандидат Доналд Трамп, споредувајќи го нејзиното искуство како обвинител со поранешен претседател осуден за кривично дело.
„Во оваа кампања, ви ветувам дека гордо ќе ги споредувам моите резултати со неговите секој ден…Дали сакате да живеете во земја на слобода, сочувство и владеење на правото, или земја на хаос, страв и омраза? “, праша Харис и го обвини Трамп дека сака да ја врати земјата наназад.
Таа, исто така, наведе голем број либерални приоритети, вклучително и дека ќе го прошири пристапот до абортус по одлуката на Врховниот суд да го прекине тоа право на федерално ниво.
„Ќе ја запреме екстремната забрана на Доналд Трамп за абортус затоа што веруваме дека жените можат сами да одлучуваат за своето тело, а не владата да им кажува што да прават. Кога Конгресот ќе го усвои нацрт-законот за враќање на репродуктивните слободи, јас ќе го потпишам како претседател на САД“, рече Харис.
Харис има предност од 44 до 42 отсто пред Трамп на национално ниво, според анкетата на Ројтерс/Ипсос на регистрираните гласачи во понеделникот и вторникот, откако претседателот Џо Бајден се повлече од трката.
Претходните анкети, спроведени пред одлуката на Бајден, покажаа дека тие се изедначени или Трамп со предност од еден процент.
Во вторникот, кандидатурата на Харис беше поддржана од лидерот на мнозинството во Сенатот Чак Шумер и лидерот на малцинството во Претставничкиот дом Хаким Џефрис.
„Сега кога процесот е завршен, ние сме денес тука да ја поддржиме потпретседателката Камала Харис“, рече Шумер на заедничката прес-конференција со Џефрис. Тој додаде дека „несебичната одлука“ на претседателот Бајден да се повлече од трката „и даде шанса на Демократската партија да се обедини за поддршка на новиот кандидат“.
Според бројките на Асошиетед прес објавени доцна во понеделникот, повеќе од 3.000 делегати го поддржале Харис, со што лесно го надминале мнозинството од 1.976 што ќе и треба на конвенцијата за да ја добие номинацијата. Бројката се заснова на јавните соопштенија на партијата во државите и интервјуата со поединечни делегати, според АП.
„Со нетрпение очекувам наскоро официјално да ја прифатам номинацијата“, рече Харис доцна во понеделникот.
