Еден од пионерите на „SUV“ во премиум класата ја доби четвртата генерација и покажа истрајност на крајно нестабилниот и променлив пазар на автомобили.
Додека „BMW“ планира да прекине со некои „SUV“ модели, како што се „XM“ или „X4“, „X3“ останува еден од столбовите на гамата на баварскиот производител во годините што доаѓаат.
По првите фотографии познати се и техничките детали за новата генерација на овој автомобил, а „BMW“ објави и голема фотогалерија од новиот „X3“.
Што се однесува до надворешниот дизајн, новите заоблени фарови потсетуваат на оние што се гледаат на „BMW X1“. Решетката на ладилникот на „X3“ е исто така редизајнирана и има малку необична текстура со пресечни хоризонтални и дијагонални линии.
Профилот на возилото е исто така многу сличен на „BMW X1“, но страничниот поглед јасно ги покажува поголемите димензии на „X3“.
Новиот модел има и прилично исправен заден дел, а за теренецот да изгледа поагресивен, тој всушност е 25 mm понизок од автомобилот што го заменува.
Големините на алуминиумските тркала започнуваат од 18 инчи, со достапни опции со дијаметар од 19-, 20- и 21-инчи.
Задните LED светла се потенки од претходно, иако задржуваат слична форма на претходниот модел.
Задниот дел на возилото е дизајниран во минималистички стил во споредба со моделот во заминување, со помалку набори и без лажни издувни цевки, пишува „Motor1“.
Новиот „X3“ има многу помодерен внатрешен изглед во споредба со неговиот претходник. Во кабината доминираат низа екрани, како што е случајот со повеќето нови модели на „BMW“, а самата табла со инструменти има заоблен дизајн.
Изобилството на амбиентално осветлување е впечатливо, а во внатрешноста можете да нарачате и верзија со целосно вегански материјали.
Екранот на централниот мултимедијален систем, кој е прикачен на дигиталната инструмент табла, го користи најновиот оперативен систем „iDrive“ на „BMW“, што значи дека е преполн со паметни функции како што се подобрени гласовни команди, услуги за стриминг музика и видео, па дури и видео игри.
Почетната понуда вклучува три мотори за „обичните“ верзии и една дополнителна варијанта со високи перформанси.
Основниот модел има 2,0-литарски бензински мотор со 208 ks, а можете да изберете и 2,0 дизел мотор со 197 ks.
Тука е и неизбежната „plug-in“ хибридна верзија која комбинира 2.0-литарски бензински мотор со електричен мотор за вкупна моќност од 300 „коњи“. Оваа верзија може да помине до 90 километри во чисто електричен режим, според производителот.
На врвот на гамата е „BMW X3 M50“, кој користи 3,0-литарски 6-цилиндричен турбо бензински мотор со речиси 400 ks. Ова го прави најмоќниот бензински мотор со шест цилиндри инсталиран во моделот „M-light“.
„BMW X3 M50“ забрзува од 0 до 100 km/h за само 4,6 секунди.
„BMW“ веќе почна да прима нарачки за новиот „X3“, а првите испораки се очекуваат наесен.
Цените на овој луксузен теренец во Германија започнуваат од 53.400 евра за основниот бензински модел, а се зголемуваат до 64.250 евра за плагин-хибридот.
Доколку ја сакате спортската верзија на „M50“, ќе треба да издвоите 73.270 евра.
