Северна Кореја ја критикуваше заедничката воена вежба меѓу Јужна Кореја, Јапонија и САД овој месец, велејќи дека таквите вежби покажуваат дека односите на трите земји се развиле во „азиска верзија на НАТО“, објавија државните медиуми во Пјонгјанг.
Во четвртокот, трите земји започнаа големи заеднички воени вежби во кои учествуваат уништувачи на борбени бродови, борбени авиони и американскиот носач на авиони на нуклеарен погон Теодор Рузвелт, чија цел е зајакнување на одбраната од проектили, подморници и воздушни напади.
Вежбата беше осмислена на самитот на лидерите на трите земји што се одржа минатата година во американското претседателско одморалиште Кемп Дејвид за да се зајакне воената соработка во услови на тензии на Корејскиот полуостров кои произлегуваат од севернокорејските тестови на оружје.
-Пјонгјанг нема да го игнорира зајакнувањето на воениот блок предводен од САД и нивните сојузници и ќе го заштити регионалниот мир со агресивен и огромен одговор – се вели во соопштението на севернокорејското Министерство за надворешни работи, пренесува новинската агенција КЦНА.
Министерството, исто така, изјави дека Вашингтон продолжува со напорите за поврзување на Јужна Кореја и Јапонија со НАТО, додавајќи дека обидите на Сеул да испорача оружје на Украина се еден пример за тие напори.
Јужна Кореја соопшти дека ќе размисли за директно снабдување со оружје на Украина, во знак на протест поради неодамнешниот договор за заемна одбрана потпишан од севернокорејскиот лидер Ким Џонг Ун и рускиот претседател Владимир Путин.
Јужна Кореја и САД го обвинија Пјонгјанг дека и испорачува на Русија оружје што Москва потоа го користи во војната во Украина.
И Русија и Северна Кореја негираат какви било вакви пратки.
Северна Кореја долго време ги осудува заедничките вежби на САД и Јужна Кореја како проба за инвазија и доказ за непријателска политика на Вашингтон и Сеул.
