Мате Римац го претстави новиот „Bugatti Tourbillon“, наследникот на моделот „Chiron“ и воедно првиот „Bugatti“ развиен целосно под палката на „Rimac“.
Цената на овој модел е 3,8 милиони евра (за основната верзија), а според Римац речиси сите 250 планирани примероци се веќе продадени, а испораките почнуваат од 2026-та година.
„Ние бевме инспирирани од легендите во светот на автомобилизмот: „Type 57SC Atlantic“, најубавиот автомобил во светот, „Type 35“, најуспешниот тркачки автомобил, како и „Type 41 Royale“, еден од најамбициозните луксузни автомобили на сите времиња“, рече Римац на официјалното претставување.
„Моделот „Tourbillon“ е уникатен. Исто како и гореспоменатите легенди од минатото, тој не е направен само за сегашноста, ниту за иднината – тој е направен за вечноста“, додаде Римац.
Што се однесува до техничките карактеристики, „Tourbillon“ располага со 1.800 ks, распоредени така што SUS моторот има 1.000, а електромоторите 800 „коњи“. Тие се напојуваат од батерија од 800 V со капацитет од 25 kWh, која се наоѓа во средниот „тунел“ зад седиштата.
„Одлуката за погонот беше можеби најважната што ја донесовме, со оглед на опциите што ни беа достапни: можевме да направиме обнова на W16, да направиме 100% електричен автомобил или да смислиме нешто сосема ново“, рече Емилио Скерво главен технолошки директор на „Bugatti Rimac“.
„На крајот, се одлучивме за најтешката опција: го изградивме погонскиот систем од нула и го споивме со електромоторниот систем и новата генерација со осумстепен менувач“, додаде Скерво.
Римац истакна дека ова е првиот целосно нов автомобил на „Bugatti“ во последните 20 години, како и дека е првиот модел кој е целосно развиен во компанијата „Bugatti Rimac“.
„Автомобилот беше развиен во Хрватска од почеток до крај“, заклучи Римац.
