Во пролетните и летните периоди, патувањето надвор од границите на родната земја станува сè почесто. Без разлика дали станува збор за работа, туризам или посета на пријатели или роднини, многумина одлучуваат да го земат воланот во свои раце и да отпатуваат.
Во овој контекст, Меѓународната возачка дозвола (МВД) се истакнува како неопходен документ за сите кои сакаат да управуваат возило во странство.
Зошто е потребна МВД?
МВД служи како официјален превод на вашата национална возачка дозвола и е призната од повеќе од 150 земји низ светот.
Таа потврдува дека лицето поседува валидна национална возачка дозвола и ги исполнува условите за управување со возило во меѓународен контекст.
Особено е важна во земји кои не се дел од Виенската конвенција за патен сообраќај, каде што националните возачки дозволи не се автоматски признати.
За кои земји е потребна?
МВД е задолжителна за земји кои не се дел од Европската Унија, како и за оние кои строго ги следат регулативите на Виенската конвенција.
Некои земји надвор од овие рамки може да имаат специфични барања или да не ја признаваат МВД издадена според одредени конвенции.
Во поглед на Грција, вистината е дека сообраќајните полицајци обично не ви бараат Меѓународна возачка дозвола, но тоа не значи дека немаат право да ви побараат и да ве казнат доколку не поседувате.
Па така, доколку патувате од Солун кон Атина, добро би било да поседувате Меѓународна возачка дозвола ако сакате да избегнете проблеми со незгодни полицајци.
Казните за непоседување МВД може да варираат, но често вклучуваат глоби и можна е конфискација на возилото.
Затоа, за документ кој чини само 900 денари и кој трае три години, не вреди да си правите дополнителни главоболки.
„МВД е повеќе од формалност. Таа е суштински документ кој обезбедува правна заштита и го олеснува меѓународното патување. Со неа, возачите можат да се чувствуваат сигурни дека ќе бидат признати како легитимни учесници во патниот сообраќај, без оглед на границите. Затоа, пред да тргнете на пат, осигурете се дека сте подготвени со сите потребни документи, вклучувајќи ја и МВД. Со тоа, ќе си обезбедите безгрижно патување и избегнување на непотребни компликации“, коментираат сообраќајните експерти.
Б.З.М.
