Германскиот производител го освежи својот најпрестижен електричен автомобил со промена на дизајнот на предната табла, за „EQS“ да изгледа повеќе како „S-Class“ со класичен мотор.
Водечкиот модел на „Mercedes“ во електричната гама е „EQS“, кој сега се обидува да и пријде на глобално успешната „S-Class“ во однос на естетиката.
Во „Mercedes“ се многу активни во однос на електрификацијата и не се откажуваат и покрај бројните искушенија. Посебно важен е врвниот модел „EQS“, кој веќе имаше проблеми со пласманот на пазарот.
Сега овој автомобил е подложен на својот прв редизајн за да постигне подобра позиција на пазарот со поконкурентен изглед.
За разлика од „BMW“, чиј „i7“ не се разликува значително од конвенционалната „седмица“, „Mercedes“ првично визуелно го оддалечи „EQS“ од „S-Class“, давајќи му модерен изглед и нагласувајќи ја аеродинамичната форма.
Целта, меѓу другото, беше визуелно да се дистанцираме од класичниот „Mercedes“ со мотори со внатрешно согорување. Сега, сепак, повторно се приближува до „S-Class“ во однос на стилот, иако само во детали.
Обликот на каросеријата е задржан, но сега „EQS“ ќе добие предна табла со препознатливиот дизајн на седаните на „Mercedes“ кој вклучува хоризонтални хромирани лајсни како дел од класичната решетка.
На хаубата е и неизбежната трикрака ѕвезда во тродимензионална форма.
Во однос на технологијата, „Mercedes“ одлучи да го зголеми капацитетот на батеријата на 118 kWh, што ќе го подобри досегот за околу 80 km.
Така, „EQS 450 4Matic“ ќе има досег на возење до 800 km, што е зголемување за 11 проценти. Обновувањето на енергијата, т.е. регенеративното сопирање, е исто така софтверски оптимизирано.
Премиерата на рестилизираниот модел е закажана за претстојниот саем „Auto China“. Цената и точниот датум на почеток на продажбата ќе бидат објавени подоцна.
