Климатските промени ќе донесат многу непознати доколку глобалните температури не се намалат до крајот на годината, изјави Гевин Шмит, директор на Институтот Годард во НАСА.
„До крајот на летото, ако сè уште има рекордни температури во северниот дел на Атлантикот или на друго место, тогаш се движиме во непознатото“, рече Шмит, додавајќи дека светот може да премине во фаза на уште побрзи климатски промени.
Претходниот месец март беше најтопол во светот досега и е десетти месец по ред кој се смета за најтопол досега, а главната причина за тоа е временскиот феномен Ел Нињо, кој се очекува да престане во наредните месеци.
Ел Нињо, кој започна минатиот јуни и го достигна својот врв во декември, создава дополнителна топлина во услови кога топлината е веќе зголемена поради големото согорување на фосилни горива.
Март оваа година беше за 1,68 степени потопол од март во „прединдустриските“ времиња, пред луѓето да почнат да согоруваат големи количини на фосилни горива.
„Нашите предвидувања прилично пропуштија конкретни ставки од 2023 година, а ако претходната статистика не функционира, тогаш станува многу потешко да се каже што ќе се случи во иднина“, истакна Шмит.
Иако научниците не се сигурни како точно ќе се развиваат условите во регионот на Тихиот Океан, сегашните прогнози сугерираат дека подоцна оваа година би можела да се случи студена фаза на Ел Нињо, што може да доведе до привремен пад на глобалните температури на воздухот.
„Сè уште се обидуваме да разбереме зошто ситуацијата толку драматично се промени во средината на минатата година и колку долго ќе продолжи оваа ситуација, без разлика дали станува збор за фазно поместување или краткорочни климатски трендови“, вели истражувачот на Службата за климатски промени на ЕУ,„Коперник“ Саманта Бурџис.
Научниците сè уште тврдат дека најдобриот начин да се запре глобалното затоплување е да се намалат емисиите на стакленички гасови.
„Ги разбирам предизвиците, но исто така е точно дека ако не дејствуваме, се обврзуваме на иднината каде можностите од 2023 година ќе бидат новото нормално“, рече истражувачот Анџелик Мелет од Институтот Меркатор Океан.
