Израелскиот премиер Бенјамин Нетанјаху се согласи на средба меѓу американски и израелски претставници за можната воена операција во Рафах, потврди денеска Белата куќа, откако Нетанјаху претходно изјави дека нема да испрати делегација бидејќи САД не ставија вето на резолуцијата на Советот за безбедност за појасот Газа.
„Канцеларијата на израелскиот премиер се согласи да ја презакаже средбата посветена на Рафах, што е добро, и сега работиме на одредување датум што ќе биде погоден за двете страни“, изјави портпаролката на Белата куќа, Карин Жан-Пјер, пренесе Си-Ен-Ен.
Таа не можеше да каже кога таа средба би можела да се одржи, но нагласи дека тоа е „итен приоритет“.
Бенјамин Нетанјаху го откажа патувањето на израелската делегација на состанокот што требаше да се одржи оваа недела, откако САД не успеаја да ја блокираат резолуцијата на Советот за безбедност со која се повикува на итен прекин на огнот во Газа.
Во изминатите два дена имавме конструктивни разговори со израелскиот министер за одбрана, а Рафах беше една од многуте теми за кои разговараа Џејк Саливан, Ентони Блинкен, Лојд Остин и Бил Барнс, изјави Жан-Пјер.
