Малините, оние сочни и слатки овошки, не се само популарни кај нас во Македонија, туку и во Србија. Со пристигнувањето на пролетта, сезоната на бербата на малини започнува, а со неа и потрагата по работна сила.
Очигледно, Србите имаат проблем и не можат да најмат доволно берачи на малини, па затоа уште во февруари се обидуваат да „врбуваат“ Македонци кои би ја работеле таа сезонска работа.
Но, дали и колку работниците се спремни да се изложат на сонцето за да ги берат овие ценети плодови?
Најновите информации од соседна Србија откриваат дека дневницата за берачите на малини може да варира од 6.000 до 8.000 динари, односно од 3.000 денари до 4.000 денари. Многумина од нив даваат и дополнителни бенефиции, вклучувајќи го сместувањето и оброкот.
Владан Вучковиќ малинар од Србија, вели дека оваа година приносот од малините ќе биде значително подобар.
„Снегот, за среќа, не му наштети на овогодишниот род. Оваа година за првпат можеби ќе се соочам со проблемот на работната сила, бидејќи ќе морам да најдам работници. Досега берев со членовите на семејството. Проблем може да биде и откупната цена на малините, која се предвидува да биде од 200 до 300 динари, па не знам како ќе се снајдам со работниците. Сè уште не сум се обидел да ги најдам, но сите ме советуваат да се обидам да „увезам“ работници од Македонија. Можеби и ќе го сторам тоа. Нудам дневница од 6.000 динари, а добивате и бесплатно сместување и еден бесплатен оброк во денот”, изјави Вучковиќ.
Еден студент од Битола, кој сезонски работи како берач на малини, сподели дека дневницата за неговата работа изнесува 2.500 денари.
„Последните две години работам како берач на малини во Србија. За мене, ова е начин да си заработам пари за летната пауза. Но, не можам да занемарам дека работата е напорна. Сонцето е најголем противник. Во текот на денот, температурите се високи, а малините се берат на отворено. Но, кога ќе видам колку пари можам да заработам, се чувствувам задоволно”, изјави студентот.
Ако не собереме берачи во доволен број од Македонија, тогаш ќе бидеме принудени да „увеземе“ работници од Азија, порачуваат српските сопственици на плантажи со малини.
Б.З.М.
