Соединетите Држави повторно ставија вето на нацрт-резолуцијата на Советот за безбедност на ОН за израелската војна во Газа, предизвикувајќи критики и од ривалите и од сојузниците.
Третото американско вето на резолуцијата на Советот за безбедност на ОН со која се бара прекин на огнот во Газа следеше еден ден откако Вашингтон објави резолуција во која привремениот прекин на огнот беше поврзан со ослободувањето на сите израелски заложници од палестинската енклава.
Нацрт-резолуцијата, изнесена од Алжир, беше поддржана од 13 членки на Советот за безбедност, што ја покажува силната поддршка на земјите ширум светот за ставање крај на разорниот конфликт во кој загинаа повеќе од 29.000 Палестинци. Велика Британија беше воздржана, а САД ставија вето.
Еве како реагираа земјите и светските лидери:
Кина
Џанг Јун, претставник на Кина во ОН, изрази „разочарување и незадоволство“ поради одлуката на САД, според новинската агенција Ксинхуа.
„Ветото на САД испраќа погрешна порака и ја прави ситуацијата во Газа поопасна“, рече Џанг, додавајќи дека приговарањето на прекинот на огнот во Газа не е „ништо друго освен зелено светло за продолжување на убиствата“.
„Гаснењето на пламенот во Газа е единствениот начин да се спречи пеколните пожари да го зафатат целиот регион“, објави Ксинхуа.
Русија
Рускиот амбасадор во Обединетите нации Василиј Небензја изјави дека американското вето на резолуцијата за прекин на огнот во Газа претставува „уште една црна страница во историјата на Советот за безбедност“.
Тој ги обвини САД дека се обидуваат да го искористат времето за Израел да ги заврши своите „нехумани планови“ во Газа, да ги протера Палестинците од територијата и целосно да ја „исчисти“ енклавата.
Тој рече дека Русија нема да се откаже и додаде дека барањето за итен прекин на огнот во Газа „останува императив“.
Франција
Претставникот на Франција во ОН, Никола де Ривиер, изрази жалење што резолуцијата на Советот за безбедност на ОН за прекин на огнот „не е усвоена, со оглед на катастрофалната ситуација во Газа“.
Де Ривиер додаде дека Франција, која гласаше за резолуцијата, ќе продолжи да работи за ослободување на сите заложници и итен прекин на огнот.
Алжир
Алжирскиот претставник рече дека Советот за безбедност на ОН „уште еднаш не успеа“, предупредувајќи дека потегот може да има огромни последици за Блискиот Исток како целина.
„Меѓународната заедница, повикувајќи на итен прекин на огнот, треба да одговори на повиците за прекин на убиствата на Палестинците. Сите оние кои ги блокираат ваквите повици треба да ги преиспитаат своите политики и нивните пресметки бидејќи погрешните одлуки ќе го чинат нашиот регион и нашиот свет. А цената ќе биде насилство и нестабилност“, рече Амар Бенџама.
„Запрашајте се, испитајте ја вашата совест. Која е причината за вашата одлука денес? Како ќе ве суди историјата“, додаде тој.
Хамас
Палестинската група објави дека одлуката на администрацијата на американскиот претседател Џо Бајден да ја блокира алжирската нацрт-резолуција го поддржува израелскиот окупациски план, чија цел е „убивање и раселување“ на Палестинците.
„Претседателот Џо Бајден и неговата администрација имаат директна одговорност за фактот што не беше усвоена резолуцијата за прекин на огнот во Газа. Американската позиција се смета за зелено светло за окупаторот да изврши повеќе злосторства и да го убие нашиот невин народ со бомбардирање и гладување“, се вели во соопштението на Хамас.
Палестинска управа (ПА)
Кабинетот на палестинскиот претседател Махмуд Абас соопшти дека американското вето ѝ пркоси на меѓународната заедница и му дава на Израел „дополнително зелено светло за окупацијата и континуираната агресија врз народот на Газа, како и за започнување крвав напад врз Рафах“.
Во соопштението тие исто така наведуваат дека ја сметаат американската администрација за одговорна за „обезбедување поддршка и заштита на варварските напади на Израел врз децата, жените и постарите лица во Газа“.
„Оваа политика ги прави Соединетите Американски Држави партнер во злосторствата за геноцид и етничко чистење и воените злосторства на израелските сили“, соопшти Кабинетот на палестинскиот претседател.
Катар
Амбасадорката на Катар во ОН, Алија Ахмед Саиф ал-Тани, рече дека жали што Советот за безбедност на ОН не ја усвои резолуцијата претставена од Алжир и вети дека ќе продолжи со напорите за обезбедување прекин на огнот во Газа.
Саудиска Арабија
Министерството за надворешни работи на Саудиска Арабија го изрази своето „жалење“ поради ветото и нагласи дека „сега, повеќе од кога било, потребна е реформа на Советот за безбедност за да може да ја изврши својата задача за одржување на мирот и безбедноста, веродостојно и без двојно стандарди“.
Норвешка
Норвешката мисија во ОН објави дека „жали“ што Советот не може да усвои резолуција за хуманитарен прекин на огнот.
„Императив е да се стави крај на ужасот во Газа“, рече таа.
Куба
Кубанскиот претседател Мигел Дијаз-Канел Бермудез ги осуди САД, велејќи дека ветото ги прави соучесници во злосторствата на Израел против Палестинците.
