Бизнис конфедерацијата на Македонија во соработка со Сојузот на синдикати на Македонија почнува со реализација на проект за вклучување на работниците во менаџирањето на компаниите.
Двете организации очекуваат дека со имплементацијата на проектот ќе се подигне свеста кај работодавачите за поголемо вклучување на работниците во управувањето на компаниите, а од друга страна дека работниците ќе ги збогатат своите знаења за нивното влијание во работата на компаниите.
Според извршниот претседател на Бизнис конфедерацијата на Македонија Миле Бошков, менаџерското управување во Македонија се уште не е на нивото за да ги вклучи работниците во управувањето на компаниите.
– Во Македонија постои општ колективен договор и повеќе закони кои ги гарантираат правата на работниците, меѓутоа со самиот влез во слободната пазарна економија и со самата транзиција, трансферот на менаџерското управување е се уште недоволен за да може целосно да ги вклучи работниците во управувањето на компаниите. За да постои заедничко управување на работниците во компаниите треба да постои поголема менаџерска и организациска свест во компаниите, истакна Бошков.
Во Словенија, чии експерти денеска ги презентираат своите искуства, овој процес на вклучување на работниците во управувањето на компаниите веќе дава позитивни резултати.
– Работодавачите се уверија дека вклучувањето на работниците во процесот на управување е позитивно затоа што со тоа нивните одлуки даваат легитимност и транспарентност што, пак, гарантира мир во компанијата и прифаќање на одлуките од страна на вработените, изјави Анже Хиршл од Здружението на работодавачи на Словенија.
Словенечките експерти се согласни дека социјалниот дијалог во голема мерка помага во остварувањето на овие цели.
