Предлогот на рускиот претседател Владимир Путин за прекин на огнот во Украина беше отфрлен од САД по контактите меѓу посредниците, изјавија руски извори за Ројтерс.
Американски извори велат дека нема официјален контакт и дека Вашингтон нема да се вклучи во разговори во кои не е вклучена Украина.
Во 2023 година, Путин испрати сигнали до Вашингтон преку посредници, вклучително и арапски партнери на Блискиот Исток, дека е подготвен да размисли за прекин на огнот во Украина, велат руски извори.
Според изворите, рускиот претседател предложил замрзнување на конфликтот на сегашните линии на фронтот и не бил подготвен да отстапи ниту една украинска територија под руска контрола, но Кремљ на тоа гледал најдобар начин за некаков мир.
„Контактите со Американците не вродија со плод“, изјави висок анонимен руски извор запознаен со разговорите кон крајот на 2023 и почетокот на 2024 година.
Друг руски извор запознаен со контактите рече дека Американците и рекле на Москва, преку посредници, дека нема да разговараат за можен прекин на огнот без учество на Украина, поради што разговорите завршиле со неуспех.
Трет извор запознаен со дискусиите рече: „Сè се распадна со Американците“.
Изворот вели дека Американците не сакале да вршат притисок врз Украина.
Медиумите претходно не известуваа за обемот на тие преговори и нивниот неуспех.
Натписите за нив доаѓаат во време кога американскиот претседател Џозеф Бајден со месеци се обидува преку Конгресот да го спроведе испраќањето дополнителна помош за Украина, но сепак се соочува со противење од сојузниците на најверојатниот републикански противник на ноемвриските избори, Доналд Трамп. Денеска Сенатот одобри помош од 61 милијарда долари, но законот сепак треба да помине низ Долниот дом на Конгресот, каде мнозинството го имаат републиканците, пренесува Ројтерс.
Анонимен американски функционер за Ројтерс изјави дека САД не водат никакви тајни преговори со Русија и дека Вашингтон е доследен да не работи зад грбот на Украина.
Украинскиот претседател Володимир Зеленски изјави дека никогаш нема да прифати руска контрола врз кој било дел од украинската територија и забрани контакти со Русија.
Кремљ, Белата куќа, американскиот Стејт департмент и Централната разузнавачка агенција (ЦИА) одбија да ги коментираат овие наводи, пишува Ројтерс.
