Меџити: Обединети сме повеќе од кога било, во Алијанса нема место за сојузници на ДУИ

Алијанса за Албанците сега е обединета и посилна, нема да имаме тројански коњи на ДУИ кои ќе ја уништат партијата. Ова го истакна министерот за здравство Фатмир Меџити на денешниот брифинг со новинарите, по актуелните случувања во неговата партија. Министерот рече дека не планира да поднесува оставка се додека Собранието не одлучи спротивно. Тој вели дека се покажа дека сите во Владата не делеле исти принципи и вредности како него и наместо да работат за доброто на граѓаните политизираат.

„Жалам што се покажа дека не сите имаат иста цел како мене во оваа Влада. Се покажа дека ДУИ преку нивните министри од кои зависат многу работи и решенија, до крај реши да политизира. Реши до крај да оди против интересот на граѓаните, пациентите и здравствените работници, а да го штити својот личен партиски интерес. Ама тоа е разликата меѓу оние како мене кои работат само на решенија и оние кои ги интересира само политика“- изјави Меџити.

Ваквата деструктивна политика на ДУИ, ја поддржале и некои членови на Алијаса за Албанците, вели Меџити тоа било и причината партијата да расчисти со оние кои имаат поразлична идеологија.

„Жалам што на тој пат најдоа сојузници и во неколкумина членови на Алијансата. Но, од друга страна можам да кажам дека сега конечно е јасно кои се вистинските членови на Алијанса кои работат чесно и стојат зад иделогијата на партијата, а кои биле тие кои заради лични интереси решиле да кумуваат со ДУИ во политиката. Алијанса за Албанците е сега обединета и посилна. Toa e така затоа што конечно граѓаните и симпатизерите може да направат разлика и да бидат сигурни дека нема да имаме тројански коњи на ДУИ кои ќе ја уништат партијата“-рече министерот за здравство Фатмир Меџити.